“Ўзбекистон – 2030” стратегиясининг такомиллаштирилган лойиҳаси: таклифлар очиқ муҳокамада (+видео)
Бугун халқимиз билимли ва ҳушёр, ўз ҳаёти, жамият ривожига дахлдор бўлган барча масалаларга синчковлик билан қарайди.
Ўзбекистон Республикаси Президенти Шавкат Мирзиёевнинг Олий Мажлис ва Ўзбекистон халқига Мурожаатномасида илгари сурилган ташаббусларга мувофиқ, “Ўзбекистон – 2030” стратегиясининг такомиллаштирилган лойиҳаси жамоатчилик муҳокамасидан ўтказилмоқда.
Лойиҳада 100 та мақсад бўйича 450 дан ортиқ самарадорлик кўрсаткичи белгиланган. Аҳоли фикрини олиш учун эса regulation.gov.uz ҳамда uzbekistan2030.uz веб-сайтларида очиқ муҳокамага қўйилган.
Изоҳлар орасида асосли ва қизиқарли таклифлар кўп. Уларни ҳар томонлама ўрганиш ва муҳокама қилиш мақсадида Давлат сиёсати ва бошқаруви академиясида соҳа мутахассислари, таклиф йўллаган жамоатчилик вакиллари ҳамда журналистлар ўртасида очиқ мулоқот ўтказилди.
Тадбирда Стратегик ривожланиш ва ислоҳотлар агентлиги ҳамда “Тараққиёт стратегияси” маркази раҳбарлари таклиф йўллаган фуқароларнинг фикрларини муҳокама қилдилар.
Шу ўринда таъкидлаш жоизки, таклифларнинг катта қисми таълим, соғлиқни сақлаш, илм-фан, саноат, қишлоқ хўжалиги ва экология соҳаларига оид бўлмоқда. Жумладан, оила, суд, бола ҳуқуқлари, гендер тенглик бўйича билдирилган таклифларга эътибор қаратилиб, айни масалада экспертлар ва иштирокчилар эркин фикр алмашди.
– Ўтган қисқа вақт ичида Стратегия лойиҳаси бўйича юртдошларимиздан 2 минг 500 га яқин фикр ва изоҳлар келиб тушди, – дейди Тараққиёт стратегияси маркази директори Элдор Туляков. – Улар мутахассислар томонидан ҳар куни сараланиб, ўрганиб борилмоқда. Таҳлилларга кўра, таклифларнинг катта қисми таълим, соғлиқни сақлаш, илм-фан, саноат, қишлоқ хўжалиги ва экология соҳаларига тегишлидир.
Таклифларни тегишли вазирлик ва идоралар билан бирга атрофлича кўриб чиқиб, такомиллаштиришга келишиб олинди. Улар аҳоли турмуш даражаси ва соҳалардаги натижадорликка таъсир этувчи сифат кўрсаткичларини шакллантиришда инобатга олинади.
Бундай очиқлик ва ўзаро фикр алмашувлар “Ўзбекистон – 2030” стратегиясини чинакам халқчил стратегияга айлантиришда муҳим омилдир.
Абдулазиз РУСТАМОВ, Ўктам ҲАИТОВ (сурат), ЎзА