Búgin xalqımız bilimli hám sergek, óziniń turmısına, jámiyettiń rawajlanıwına baylanıslı bolǵan barlıq máselelerge itibarlı qaraydı.
Ózbekstan Respublikası Prezidenti Shavkat Mirziyoevtiń Oliy Majlis hám Ózbekstan xalqına Múrájatında alǵa qoyılǵan baslamalarǵa muwapıq, “Ózbekstan – 2030” strategiyasınıń jetilistirilgen joybarı jámiyetshiliktiń dodalawınan ótkerilmekte.
Joybarda 100 maqset boyınsha 450 den aslam nátiyjelilik kórsetkishi belgilengen. Xalıqtıń pikirin alıw ushın bolsa regulation.gov.uz hám uzbekistan2030.uz veb-saytlarında ashıq dodalawǵa qoyılǵan.
Túsindiriwler arasında tiykarlı hám qızıqlı usınıslar kóp. Olardı hár tárepleme úyreniw hám dodalaw maqsetinde Mámleketlik siyasat hám basqarıw akademiyasında taraw qánigeleri, usınıs jollaǵan jámiyetshilik wákilleri hám jurnalistler arasında ashıqtan-ashıq sóylesiw ótkerildi.
Ilajda Strategiyalıq rawajlanıw hám reformalar agentligi hám “Rawajlanıw strategiyası” orayınıń basshıları usınıs jollaǵan puqaralardıń pikirlerin dodaladı.
Usı jerde usınıslardıń úlken bólegi bilimlendiriw, densawlıqtı saqlaw, ilim, sanaat, awıl xojalıǵı hám ekologiya tarawlarına tiyisli ekenin atap ótiw kerek. Sonıń ishinde, shańaraq, sud, bala huqıqları, gender teńlik boyınsha bildirilgen usınıslarǵa itibar qaratılıp, bul máselede ekspertler hám qatnasıwshılar erkin pikir alıstı.
– Ótken qısqa waqıt ishinde Strategiya joybarı boyınsha watanlaslarımızdan 2 mıń 500 ge shamalas pikir hám túsinikler kelip tústi, – deydi Rawajlanıw strategiyası orayınıń direktorı Eldor Tulyakov. – Olar qánigeler tárepinen hár kúni tańlap, úyrenip barılmaqta. Tańlawlarǵa bola, usınıslardıń úlken bólegi bilimlendiriw, densawlıqtı saqlaw, ilim, sanaat, awıl xojalıǵı hám ekologiya tarawlarına tiyisli.
Usınıslardı tiyisli ministrlikler hám uyımlar menen birge hár tárepleme kórip shıǵıp, jetilistiriwge kelisip alındı. Olar xalıqtıń turmıs dárejesi hám tarawlardaǵı nátiyjelilikke tásir etiwshi sapa kórsetkishlerin qáliplestiriwde esapqa alınadı.
Bunday ashıq-aydınlıq hám óz-ara pikir alısıwlar “Ózbekstan – 2030” strategiyasın haqıyqıy xalıqshıl strategiyaǵa aylandırıwda áhmiyetli faktor bolıp esaplanadı.

Abdulaziz RUSTAMOV, Wktam HAITOV (surat), ÓzA