Қорақалпоғистон Республикаси Жўқорғи Кенгесининг Раиси Аманбай Оринбаев республикамизда жойлашган олий ўқув юртларида таҳсил олаётган фаол талаба-ёшлар билан учрашди.

Учрашувда республикамиз раҳбари сўнгги йилларда Ўзбекистон Республикаси Президентининг Қорақалпоғистонга бўлган алоҳида эътибори билан қабул қилган махсус Фармон ва қарорлари, шу асосда амалга оширилаётган эзгу ишлар, ҳаётимизга кенг жорий этилаётган ислоҳотлар ҳақида кенг тарзда сўзлаб берди. Жумладан, бу ишларнинг яққол далили сифатида амалга оширилган ижобий ишлар кўрсатиб ўтилиб, бугунги кунда давом этаётган ишлар, шунингдек, келгусида бажарилиши лозим бўлган йирик лойиҳаларни қайд этди.

Ҳақиқатан ҳам шуни алоҳида таъкидлашимиз керакки, сўнгги вақтларда Қорақалпоғистонда чин маънода йирик тарихий воқеалар ва янгиланишлар юз берди. Ҳурматли Президентимиз томонидан фақатгина Қорақалпоғистон халқи ва тадбиркорлари учун илгари бўлмаган имтиёзлар, кўплаб имкониятлар яратиб берилди.

Ўтказилган учрашувда ана шундай эзгу тадбирлар кенг муҳокама қилинди.

Шундан сўнг, республикамиз раҳбари ёшлар билан яқиндан мулоқот қилиб, талабаларнинг таклиф ва фикрларини тинглади ва ҳар бир кўтарилган масала белгилаб олинди.

Учрашув давомида жамоат ишларида фаол иштирок этиб, кўпчиликка ўрнак бўлаётган бир қатор ёшлар Қорақалпоғистон Республикаси Жўқорғи Кенгеси Президиумининг қарори билан «Фахрий ёрлиқ» билан тақдирланди.

Қорақалпоғистон ахборот агентлиги