Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızda jaylasqan joqarı oqıw orınlarında oqıp atırǵan belsendi student-jaslar menen ushırastı.
Ushırasıwda respublikamız basshısı sońǵı jılları Ózbekstan Respublikası Prezidentiniq Qaraqalpaqstanǵa bolǵan ayrıqsha itibarı menen qabıl etken arnawlı Párman hám qararları, sol tiykarda ámelge asırılıp atırǵan iygilikli jumıslar, turmısımızǵa keńnen engizilip atırǵan reformalar haqqında keń túrde aytıp berdi. Sonıń ishinde, bul jumıslardıń ayqın dáliyli sıpatında ámelge asırılǵan unamlı isler kórsetip ótilip, búgingi kúni dawam etip atırǵan jumıslar, sonday-aq, aldaǵı isleniwi tiyis iri joybarlardı atap ótti.
Haqıyqatında da sonı ayrıqsha aytıp ótiwimiz kerek, sońǵı waqıtları Qaraqalpaqstanda shın mánisinde iri tariyxıy waqıyalar hám jańalanıwlır júz berdi. Húrmetli Prezidentimiz tárepinen tek ǵana Qaraqalpaqstan xalqı hám isbilermenleri ushın aldın bolmaǵan jeńillikler, kóplegen imkaniyatlar jaratıp berildi.
Ótkerilgen ushırasıwda mine usınday iygilikli ilajlar keń túrde sóz etildi.
Bunnan soń, respublikamız basshısı jaslar menen jaqınnan pikirlesip, studentlerdiń usınıs hám pikirlerin tıńladı hám hár bir kóterilgen másele belgilep alındı.
Ushırasıw dawamında jámiyetlik jumıslarda belsene qatnasıp, kópshilikke úlgi bolıp atırǵan bir qatar jaslar Qaraqalpaqstan Respublikası Joqarǵı Keńesi Prezidiumınıń qararı menen «Húrmet jarlıǵı» menen sıylıqlandı.

Qaraqalpaqstan xabar agentligi