Венесуэла ҳукуматининг бир қатор расмийлари, жумладан муваққат Президент Делси Родригес Х (собиқ “Twitter”) ижтимоий тармоғида яна фаол кўрина бошлади. Бу ҳолат 2024йил жорий этилган тақиқ амалда бекор қилинганини англатмоқда.

–Ушбу платформа орқали мулоқотни қайта тиклаймиз, – деб ёзди Родригес расмий саҳифасида.

У ўзини “Венесуэла Боливар Республикасининг вақтинча тайинланган Президенти” дея атаб, Николас Мадуро билан Боливар ва Чaвез ғояси асосида ҳаракат қилаётганини таъкидлади.

Эслатиб ўтамиз, АҚШ томонидан яқинда қўлга олинган собиқ етакчи Мадуро 2024 йил август ойида Х платформасини ёпишга қарор қилган эди. Бунга тармоқ эгаси Илон Маск билан юзага келган очиқ баҳс сабаб бўлган.

Аҳоли анча вақт давомида Хдан фойдалана олмади.

Мамлакат ички ишлар вазири Диосдадо Кабелло мазкур тармоқда Венесуэла ва бошқа давлатлардаги фуқароларга мурожаат қилиб, вазиятга бефарқ бўлмаганларга миннатдорлик билдирди. Шунингдек, Делсининг укаси, Миллий Ассамблея раиси Хорхе Родригес фаровонлик, мулоқот ва ўзаро ҳурмат йўлидан бориш зарурлигини таъкидлади.

CNN Венесуэла Миллий телекоммуникация комиссияси – “Cонател”дан чеклов олиб ташлангани бўйича расмий изоҳ сўраган. Шунингдек, Х компаниясига мамлакат ҳудудида платформадан фойдаланиш тўлиқ тикланганми ёки йўқлиги юзасидан сўров юборган.

Шу куни Мадуронинг тасдиқланган аккаунти ҳам фаоллашиб, Николас ва рафиқаси Силиа Флорес тасвирланган сурат эълон қилинди. Расмда улар “ўғирланганига 11 кун бўлгани” ёзуви ва тегишли хештег жойлаштирилган. Аккаунтни айни пайт ким бошқараётгани номаълум. Мадуро саҳифасида ҳанузгача у ўзини 2025-2031 йиллар учун Венесуэла Президенти сифатида кўрсатмоқда.

Ф.Яхшибоева, ЎзА