Venesuela húkimetiniń bir qatar rásmiyleri, sonıń ishinde, waqıtsha Prezident Delsi Rodriges X (burınǵı “Twitter”) sociallıq tarmaǵında jáne belsendilik kórsete basladı. Bul jaǵday 2024-jılı engizilgen qadaǵan etiw ámelde biykar etilgenin ańlatpaqta.
– Usı platforma arqalı sóylesiwdi qayta tikleymiz, – dep jazdı Rodriges rásmiy betinde.
Ol ózin “Venesuela Bolivar Respublikasınıń waqıtsha tayınlanǵan Prezidenti” dep atap, Nikolas Maduro menen Bolivar hám CHavez ideyası tiykarında háreket etip atırǵanın atap ótti.
Esletip ótemiz, AQSh tárepinen jaqında qolǵa alınǵan burınǵı jetekshi Maduro 2024-jıl avgust ayında X platformasın jabıwǵa qarar etken edi. Oǵan tarmaq iyesi Ilon Mask penen júzege kelgen ashıq daw sebep bolǵan.
Xalqı kóp waqıt dawamında X tan paydalana almadı.
Mámleket ishki isler ministri Diosdado Kabello usı tarmaqta Venesuela hám basqa da mámleketlerdegi puqaralarǵa múrájat etip, jaǵdayǵa biypárwa bolmaǵanlarǵa minnetdarshılıq bildirdi. Sonday-aq, Delsinıń inisi, Milliy Assambleya baslıǵı Xorxe Rodriges abadanlıq, qarım-qatnas hám óz-ara húrmet jolınan barıw zárúrligin atap ótti.
SNN Venesuela Milliy telekommunikaciya komissiyası – “Sonatel”den sheklew alıp taslanǵanı boyınsha rásmiy túsinik soraǵan. Sonday-aq, X kompaniyasına mámleket aymaǵında platformadan paydalanıw tolıq tiklengen yamasa tiklenbegenligi boyınsha soraw jibergen.
Usı kúni Maduroniń tastıyıqlanǵan akkauntı da aktivlesip, Nikolas hám ómirlik joldası Silia Flores súwretlengen súwret járiyalandı. Súwrette olar “urlanǵanına 11 kún bolǵanı” jazıwı hám tiyisli xeshteg jaylastırılǵan. Esapbetti házirgi waqıtta kim basqarıp atırǵanı belgisiz. Maduro betindegi maǵlıwmatta elege shekem ol ózin 2025-2031-jıllar ushın Venesuela Prezidenti sıpatında kórsetpekte.

F.YaXShIBOEVA, ÓzA