Эронда иқтисодий муаммолар туфайли юзага келган норозилик намойишларида ҳалок бўлганлар сони 646 кишига етди.

Хабарларга кўра, 31 та ҳудудда бўлиб ўтган норозилик намойишларида 505 нафар намойишчи, 133 нафар хавфсизлик ходими ва битта прокурор ҳалок бўлган. Намойишлар пайтида ҳибсга олинганларнинг умумий сони 10 минг нафардан ошган.

Таъкидланишича, давом этаётган нотинчликларда минглаб одамлар жароҳат олган. Жароҳатларнинг аксарияти резина ўқлар ва металл шарлар қўлланилиши натижасида юзага келган. Бироқ Эрон расмийлари норозилик намойишлари пайтида ҳалок бўлганлар ва жароҳатланганлар сони ҳақида ҳали ҳеч қандай баёнот бермади.

Эслатиб ўтамиз, Эрондаги норозилик намойишлари 2025 йил 28 декабрь куни Теҳрондаги тарихий Катта бозорда бўлиб ўтди. Савдогарлар миллий валютанинг хорижий валюталарга нисбатан кескин пасайиши ва иқтисодий қийинчиликларнинг кучайиши туфайли норозилик намойишларини бошладилар. Норозиликлар тезда мамлакат бўйлаб кўплаб шаҳарларга тарқалди.

Айниқса, 8 январь куни Теҳрондаги норозилик намойишлари кескин авж олди. Тартибсизликлар пайтида намойишчилар автобуслар ва тез ёрдам машиналари, 24 та турар-жой бинолари, 25 та масжид, 2 та касалхона, 26 та банк ва бошқа давлат ва жамоат бинолари каби кўплаб биноларни ёқиб юборди ва вайрон қилди.

Г.Сатторова, ЎзА