Ҳозирда мобил алоқа хизматлари аҳолининг кундалик ҳаётида катта аҳамиятга эга бўлиб бормоқда. Интернет, қўнғироқлар ва рақамли хизматларсиз на таълим, на бизнес, на ижтимоий ҳаётни тасаввур этиб бўлади. Шу боис мобил алоқа нархларидаги ҳар қандай ўзгариш аҳолининг кенг қатламларига бевосита таъсир кўрсатади.

Миллий статистика қўмитаси маълумотларига кўра, 2025 йил ноябрь ойида мобил алоқа хизматлари нархлари октябрь ойига нисбатан ўртача 0,5 фоизга ошган. Энг эътиборга молик жиҳати шундаки, йил бошидан буён мазкур хизматлар 9,8 фоизга қимматлашган.

Нархларнинг 9,8 фоизга ошиши, бир қарашда катта кўрсаткич бўлиб туюлмаслиги мумкин. Бироқ, доимий равишда мобил алоқадан фойдаланадиган аҳоли учун бу харажатлар сезиларли даражада ортишига олиб келади. Ойлик тариф режалари қимматлашиши оилавий бюджетга қўшимча босим бўлиши мумкин, айниқса бир оилада бир нечта абонент бўлса.

Шу билан бирга, мутахассислар мобил алоқа бозорида рақобат мавжудлиги нархларнинг кескин ошиб кетишини чеклаб турганини таъкидлашмоқда. Операторлар абонентларни сақлаб қолиш учун турли акциялар, пакетлар ва бонусларни таклиф қилишга мажбур.
Айрим ҳолларда тариф нархлари оширилган бўлса-да, пакет ҳажми кенгайтирилиши ёки қўшимча хизматлар киритилиши орқали бу ўсиш юмшатилмоқда.

2025 йил бошидан буён мобил алоқа хизматлари нархларининг 9,8 фоизга ошгани иқтисодий омиллар билан изоҳланади. Бу жараён аҳолининг кундалик харажатларига таъсир қилаётган бўлса-да, хизматлар сифати ва қамровининг кенгайиши билан мувозанатлаштирилмоқда.

Дилдора ДЎСМАТОВА,

ЎзА