Шимолий Корея раҳбари Ким Чен Ин янги гипертовушли ракеталар синовини шахсан кузатганини маълум қилди. КХДРга қўшни давлатлар бир кун аввал баллистик ракеталар учирилгани ва бу навбатдаги провокация эканини айтган эди. Эътиборлиси, синовлар Жанубий Корея президенти Ли Чжэ Мённинг Хитойга, Си Цзиньпин билан саммитда иштирок этиш учун жўнаб кетишидан бир неча соат олдин амалга оширилган.

KCNA хабарига кўра, якшанба кунги машғулот гипертовушли қурол тизимининг жанговар шайлигини текшириш ҳамда мамлакат ҳарбий бўлинмаларининг амалий маҳоратини оширишга қаратилди.

Ким Чен Ин миллий мудофаа учун ниҳоятда муҳим бўлган технологик вазифанинг муваффақиятли бажарилганини тасдиқлаган ва ҳарбий имкониятлар, айниқса ҳужумкор қурол тизимлари доимий равишда такомиллаштириб борилиши шарт эканини қайд этган.

Экспертлар фикрича, агар Шимолий Корея ҳақиқатан ҳам гипертовушли қуролга эга бўлса, бу унга АҚШ ва Жанубий Кореянинг ракетага қарши мудофаа тизимларини ёриб ўтиш имконини беради. Сўнгги йилларда Пхеньян бу технологияни қўлга киритиш учун бир қатор синовлар ўтказган, бироқ кўплаб хорижий мутахассислар синов ракеталари зарур тезлик ва бошқа техник қобилиятларга тўлиқ эришганига шубҳа билан қарамоқда.

Сўнгги ҳафталарда КХДР узоқ масофага учувчи стратегик қанотли ракеталарини ҳам текширганини билдирган. Шунингдек, ўлка нашрлари илк ядровий двигателли сувости кемаси қурилишида сезиларли силжишлар борлигини кўрсатадиган суратларни эълон қилган. Кузатувчиларга кўра, Пхеньян бу ҳаракатлари орқали ҳукмрон Ишчилар партияси қурултойи олдидан қурол-яроғ соҳасидаги ютуқларини намойиш этишни мақсад қилган.

Мамлакатда охирги ракета учиришлар АҚШнинг шанба куни Венесуэлада ўтказган ҳарбий амалиётидан кейин содир бўлди. Ушбу операция натижасида Николас Мадуро ҳокимиятдан четлатилиб, Вашингтонга олиб кетилган ва унга нарко-терроризм бўйича айбловлар қўйилган. Шимолий Корея бу амалиётни кескин қоралаб чиқди.

Мусулмон Зиё, ЎзА