Arqa Koreya basshısı Kim CHen In jańa giperdawıslı raketalar sınaǵın jeke ózi baqlaǵanın málim etti. KXDRǵa qońsılas mámleketler bir kún aldın ballistikalıq raketalar ushırılǵanı hám bul gezektegi provokaciya ekenin aytqan edi. Itibarlı tárepi, sınaqlar Qubla Koreya prezidenti Li CHje Myonnıń Qıtayǵa, Si Czinpin menen sammitte qatnasıw ushın jónep ketiwinen bir neshe saat aldın ámelge asırılǵan.

KCNA xabarına bola, ekshembi kúngi shınıǵıw giperdawıslı qural sistemasınıń jawıngerlik tayarlıǵın tekseriw hám mámleket áskeriy bólimsheleriniń ámeliy sheberligin arttırıwǵa qaratıldı.
Kim CHyon In milliy qorǵanıw ushın oǵada áhmiyetli bolǵan texnologiyalıq wazıypanıń tabıslı orınlanǵanın tastıyıqlaǵan hám áskeriy imkaniyatlar, ásirese, hújim qural-jaraq sistemaları turaqlı túrde jetilistirilip barılıwı shárt ekenligin atap ótken.
Ekspertlerdiń pikirinshe, eger Arqa Koreya haqıyqatında da giperdawıslı quralǵa iye bolsa, bul oǵan AQSh hám Qubla Koreyanıń raketaǵa qarsı qorǵanıw sistemaların jarıp ótiw imkaniyatın beredi. Sońǵı jılları Pxenyan bul texnologiyanı qolǵa kirgiziw ushın bir qatar sınaqlar ótkergen, biraq kóplegen sırt elli qánigeler sınaq raketaları zárúr tezlik hám basqa da texnikalıq qábiletlerge tolıq eriskenine gúman menen qaramaqta.
Sońǵı háptelerde KXDR uzaq aralıqqa ushıwshı strategiyalıq qanatlı raketaların da teksergenin bildirgen. Sonday-aq, úlke basılımları birinshi yadrolıq dvigatelli suw astı kemesiniń qurılısında sezilerli ilgerilewler bar ekenligin kórsetetuǵın súwretlerdi járiyaladı. Baqlawshılarǵa bola, Pxenyan bul háreketleri arqalı húkim súrip atırǵan Jumısshı partiyası qurıltayı aldınan qural-jaraq tarawındaǵı jetiskenliklerin kórsetiwdi maqset etken.
Mámlekette sońǵı raketa ushırılıwları AQShtıń shembi kúni Venesuelada ótkergen áskeriy ámeliyatınan keyin júz berdi. Usı operaciya nátiyjesinde Nikolas Maduro hákimiyattan shetletip, Vashingtonǵa alıp ketilgen hám oǵan narko-terrorizm boyınsha ayıplawlar qoyılǵan. Arqa Koreya bul ámeliyattı keskin qaralap shıqtı.

Musulmon Ziyo, ÓzA