Республика ихтисослаштирилган она ва бола саломатлиги илмий-амалий тиббиёт маркази Қорақалпоғистон Республикаси филиалида мамлакатимизда коррупцияга қарши курашиш бўйича Ўзбекистон Республикаси Президенти томонидан қабул қилинаётган фармон ва ҳукумат қарорларининг аҳамиятини кенг тушунтиришга бағишланган тадбир бўлиб ўтди.

Тадбирда Қорақалпоғистон Республикаси Вазирлар Кенгашининг Коррупцияга қарши ички назорат бўлими бошлиғи Б.Матмуратов, Қорақалпоғистон Республикаси прокуратураси бўлим прокурори Е.Адилов, Иқтисодий жиноятларга қарши курашиш департаментининг тезкор вакили А.Қидирниязов, Қорақалпоғистон Республикаси Жўқорғи Кенгеси депутатлари, Республика ихтисослаштирилган она ва бола саломатлиги илмий-амалий тиббиёт маркази Қорақалпоғистон Республикаси филиали тиббиёт ходимлари иштирок этди.

Тадбирда сўзга чиққанлар, мамлакатимизда коррупцияга қарши курашиш бўйича Президентимиз томонидан қабул қилинаётган фармон ва ҳукумат қарорларининг аҳамиятига тўхталиб, тараққиётнинг янги босқичига қадам қўяётган Ўзбекистон учун коррупция иллатининг ҳар қандай кўриниши амалга оширилаётган ислоҳотлар натижасига салбий таъсир кўрсатишини таъкидлади.

Таъкидланганидек, коррупциянинг олдини олиш ва унга қарши курашишда бир ёки икки давлат органининг саъй-ҳаракатлари билан ижобий натижага эришиб бўлмайди. Шу боис, бу борада ҳуқуқ-тартибот идоралари, давлат ташкилотлари билан ҳамкорликда барча фуқароларимиз ва жамоатчилик назорати институтларининг имкониятларидан ҳам кенг фойдаланиш зарур.

Тадбир якунида иштирокчилар марузачилардан ўзларини қизиқтирган саволларига жавоб олди.

Қорақалпоғистон ахборот агентлиги