Respublikalıq qánigelestirilgen ana hám bala salamatlıǵı ilimiy-ámeliy medicina orayı Qaraqalpaqstan Respublikası filialında Mámleketimizde korrupciyaǵa qarsı gúresiw boyınsha Ózbekstan Respublikası Prezidenti tárepinen qabıl etilip atırǵan pármanlar hám húkimetlik qararlardıń áhmiyetin keńnen túsindiriwge baǵıshlanǵan ilaj bolıp ótti.

Ilajda Qaraqalpaqstan Respublikası Ministrler Keńesiniń Korrupciyaǵa qarsı ishki qadaǵalaw bólimi baslıǵı B.Matmuratov, Qaraqalpaqstan Respublikası prokuraturası bólim prokurorı E.Adilov, Ekonomikalıq jınayatlarǵa qarsı gúresiw departamentiniń operativ wákili A.Qıdırniyazov, Qaraqalpaqstan Respublikası Joqarǵı Keńesi deputatları, Respublikalıq qánigelestirilgen ana hám bala salamatlıǵı ilimiy-ámeliy medicina orayı Qaraqalpaqstan Respublikası filialı medicina xızmetkerleri qatnastı.
Ilajda shıǵıp sóylewshiler, mámleketimizde korrupciyaǵa qarsı gúresiw boyınsha Prezidentimiz tárepinen qabıl etilip atırǵan pármanlar hám húkimetlik qararlardıń áhmiyetine toqtap ótip, rawajlanıwdıń jańa basqıshına qádem qoyıp atırǵan Ózbekstan ushın korrupciya illetiniń hár qanday túrdegi kórinisi ámelge asırılıp atırǵan reformalardıń nátiyjesine keri tásirin tiygizetuǵının atap ótti.
Atap ótilgenindey, korrupciyanıń aldın alıwda hám oǵan qarsı gúresiwde bir yaki eki mámleketlik uyımlardıń is-háreketleri menen unamlı nátiyjege erisip bolmaydı. Sonlıqtan, bul baǵdarda huqıq qorǵaw uyımları, mámleketlik shólkemler menen birgelikte barlıq puqaralarımız hám jámiyetlik qadaǵalaw institutlarınıń imkaniyatlarınan da keńnen paydalanıw zárúr.
Ilaj sońında qatnasıwshılar bayanatshılardan ózlerin qızıqtırǵan sorawlarına juwap aldı.

Qaraqalpaqstan xabar agentligi