Нукус олимпия ва паралимпия спорт турларига тайёрлаш маркази мактабининг стадионида «Орол» ва «Бухоро» футбол клублари ўртасида Ўзбекистон Суперлигасига йўлланма олиш учун ўйин бўлиб ўтди.

Қорақалпоғистонлик неча минглаб футбол мухлисларининг қўллаб-қувватлаши билан ўтган ўйиннинг биринчи таймида республикамиз жамоаси бир неча бор ҳужумларга ўтган бўлса-да, ундан натижа чиқмади. Аксинча, таркибида Хорватия, Грузия ва бошқа хорижий мамлакатлар футболчилари ўйнаётган «Бухоро» жамоаси кўплаб хавфли ҳужумлар уюштириб, учрашувнинг 32-дақиқасида грузиялик легионер Тома Табатадзе «Орол» дарвозасига гол уришга муваффақ бўлди.

Учрашувнинг иккинчи таймида жамоамиз бош мураббийи Нағметулла Қутибоев ўйинга Руслан Қалмаганбетов, Иззетулла Абдулҳақов каби моҳир ҳужумчилар ва Муҳриддин Расулов, Дамир Низанов, Аъзамжон Алиев каби тажрибали футболчиларни тушириб, учрашувда «Орол» жамоасининг тўпни эгаллаш ва хавфли ҳужумлар ташкилий бўйича кўрсаткичини яхшилади. Бироқ дарвозага гол уриш масаласига келганда футболчиларимизга бироз тажриба ва маҳорат етишмади.

Шундай қилиб, Про-лигада яхши ўйин кўрсатиб иккинчи ўринни эгаллаган «Орол» жамоаси ўз мухлисларининг тинимсиз қўллаб-қувватлашига қарамасдан бу ўйинда Супер-лиганинг тажрибали жамоаси ҳисобланган Бухоро вилоятининг «Бухоро» клубига минимал ҳисобда ютқазиб, Супер-лига йўлланмасидан қуруқ қолди.

Албатта, бу ўйинда «Орол»нинг ёш футболчиларининг ёшлик шижоати ва интилиши, «Бухоро» клуби таркибида ўйнаган легионерларнинг жуда бой тажрибаси ва юқори спорт маҳорати устун келди дея оламиз.

Жамоамизга эса, келаси мавсумда яхши ўйинлар кўрсатиб, ўз мухлисларини қувонтиришига қатъий ишониб қоламиз.

Адилбай Оразов,

Қорақалпоғистон ахборот агентлиги шарҳловчиси