Nókis olimpiya hám paraolimpiya sport túrlerine tayarlaw orayı mektebiniń stadionında «Aral» hám «Buxara» futbol klublarınıń arasında Ózbekstan Superligasına ótiw ushın oyın bolıp ótti.

Qaraqalpaqstanlı neshe mıńlaǵan futbol jankúyerleriniń qollap-quwatlawı menen ótken oyınnıń birinshi taymında respublikamız komandası bir neshe márte hújimlerge ótken menen onnan nátiyje shıqpadı. Kerisinshe, quramında Xorvatiya, Gruziya hám basqa sırt ellerdiń futbolshıları oynap atırǵan «Buxara» komandası kóplegen qáwipli hújimler shólkemlestirip, ushırasıwdıń 32-minutında gruziyalı legioner Toma Tabatadze «Aral» dárwazasına gol urıwǵa eristi.
Ushırasıwdıń ekinshi taymında komandamızdıń bas treneri Naǵmetulla Qutıbaev oyınǵa Ruslan Qalmaǵanbetov, Izzetulla Abdulhaqov sıyaqlı sheber hújimshiler hám Muhriddin Rasulov, Damir Nızanov, Azamjan Alievtey tájiriybeli futbolshılardı oyınǵa túsirip, ushırasıwda «Aral» komandasınıń toptı iyelew hám qáwipli hújimler shólkemlestiriw boyınsha kórsetkishin jaqsıladı. Degen menen dárwazaǵa gol urıw máselesine kelgende futbolshılarımızǵa biraz tájiriybe hám sheberlik jetispedi.
Solay etip, Pro-ligada jaqsı oyın kórsetip ekinshi orındı iyelegen «Aral» komandası óz jankúyerleriniń tınımsız qollap-quwatlawına qaramastan bul oyında Superliganıń tájiriybeli komandası esaplanǵan Buxara wálayatınıń «Buxara» klubına minimal esapta jeńilip, Superliga jollamasınan bos qaldı.
Álbette, bul oyında «Aral»dıń jas futbolshılarınıń jaslıq jigeri hám umtılısınan, «Buxara» klubınıń quramında oynaǵan legionerlerdiń oǵada bay tájiriybesi hám joqarı sport sheberligi ústin keldi dep ayta alamız.
Komandamızǵa bolsa, kelesi máwsimde jaqsı oyınlar kórsetip, óz jankúyerlerin quwanıshqa bóleytuǵınlıǵına bekkem isenip qalamız.

Adilbay Orazov,
Qaraqalpaqstan xabar agentligi sholıwshısı.