Ўзбекистон ва Туркманистон ўртасидаги ўзаро манфаатли ҳамкорлик сўнгги йилларда янги босқичга кўтарилиб, туризм, савдо ва маданий алмашинув соҳаларида кенг имкониятларни яратмоқда. Айниқса, халқаро кўргазмаларда икки давлат компаниялари ва тур агентликларининг фаол иштироки қўшма лойиҳаларни амалга ошириш, янги йўналишларни йўлга қўйиш ва минтақавий туризм салоҳиятини янада оширишга хизмат қилмоқда.

Яқинда пойтахтимизда ўтказилган «Марказий Осиё – Европа Иттифоқи» биринчи туризм форумида «Turkmen Travel» компанияси вакиллари ўз имкониятларини тақдим қилди.

Бу ҳақда компания менежери Энеш Амангелдиева ЎзА мухбирига қуйидагиларни гапириб берди:

– ​Биз халқаро кўргазмаларни ташкил қилиш ва йирик тадбирларни амалга ошириш билан шуғулланамиз. Шу сабабли, ушбу форумда Туркманистоннинг миллий павильонини ташкил этиб, имкониятларимизни илк бор тақдим қилдик. Бизнинг иштирокимиз бевосита апрель ойида бўлиб ўтадиган «Turkmen Travel» халқаро кўргазмасига тайёргарликнинг бир қисми ҳисобланади.

2026 йил 14-16 апрель кунлари ўтказиладиган бу тадбир доирасида хорижий компаниялар, тур операторлари ва агентликлар учун кенг имкониятлар тақдим этилади. Шунингдек, бу йил илк бор Ўзбекистонда халқаро туризм кўргазмасини ҳам ташкил этишга киришдик ва биз унинг расмий тақдимотини амалга оширяпмиз. Шу боис, бу ерга келганимизни жуда муҳим қадам, деб билaман.

Айтиш керакки, Ашхободда ўтказиладиган кўргазма ҳақидаги биринчи расмий маълумотни айнан Ўзбекистонда тақдим этдик. Мен форум доирасида бўлиб ўтган тадбирларда спикер сифатида чиқиш қилиб, кўргазманинг мақсад ва вазифаларини батафсил шарҳлаб бердим.

Бизнинг тур агентликларимиз ҳам тур маҳсулотларини танитиш, ўзбек тур операторлари билан ҳамкорлик шартномаларини имзолаш, қўшма йўналишлар яратиш, янги маршрутлар ишлаб чиқиш мақсадида иштирок этди. Бу ўзаро амалий ҳамкорлик бир пайтлар Ипак йўлидаги савдо-маданий боғланишларнинг изчил давоми сифатида жуда муҳим аҳамиятга эга.

Ўзбекистон билан чегарадош давлат сифатида бизнинг ўзаро туризм алмашинувимиз жуда қулай ва самарадордир. Ўзбек сайёҳлари Туркманистоннинг тарихий ва маданий мерос объектларига қийинчиликсиз ташриф буюра олади. Шунинг учун ҳам биз миллий павильонимиз билан бу тадбирда иштирок этишни аҳамиятли, тарихий қадам, деб қабул қиламиз. Бу ерда Ашхободдан етти компания, шунингдек, Лебап вилояти ва бошқа ҳудудлардан келган агентликлар ҳам ўз фаолиятини намойиш қилди.

Ростини айтсам, натижаларни кутгандан ҳам юқори баҳолайман. Тур операторларимиз бир қатор ўзбек компаниялари билан ҳамкорлик шартномаларини имзолади. Шунингдек, Япония, Таиланд каби мамлакатлардан келган халқаро иштирокчилар ҳам бизнинг апрель ойидаги кўргазмамизда қатнашишга қизиқиш билдириб, Ашхободдаги тадбир учун стендлар банд қилишди. Бу эса икки мамлакат ўртасидаги иқтисодий ва туризм соҳасидаги муносабатларни янги босқичга олиб чиқишга хизмат қилади.

Албатта, келаси йил ҳам бу кўргазмада иштирок этишни режалаштиряпмиз. Чегара масалаларига келсак, ҳужжатлар бўйича ҳеч қандай муаммо юзага келмади, ҳар икки томонда ҳам ўтиш жуда осон кечди. Умид қиламизки, келаси йили Ашхобод-Тошкент тўғридан-тўғри авиақатновлари очилади. Ҳозирча бундай рейс мавжуд эмас. Яқинда Президентимиз Марказий Осиё давлатлари раҳбарлари саммитида иштирок этганида бу йўналиш бўйича келишув имзолангани ҳам айтилди. Агар рейслар очилса, икки мамлакат сайёҳлари учун имкониятлар янада кенгаяди.

Қийинчиликлар ҳужжат ёки расмий талаблар билан боғлиқ эмас, асосан йўл инфратузилмасига оид. Бироқ бу ҳамкорлигимизга халақит бермайди. Аксинча, ҳар икки давлат ўртасидаги дўстона муносабатлар ва очиқ мулоқот бизни янада яқинлаштирмоқда.

ЎзА мухбири 

Насиба Зиёдуллаева 

ёзиб олди.