Ózbekstan hám Túrkmenstan arasındaǵı óz-ara paydalı birge islesiw keyingi jıllarda jańa basqıshqa kóterilip, turizm, sawda hám mádeniy almasıw tarawlarında keń imkaniyatlar jaratpaqta. Ásirese, xalıqaralıq kórgizbelerde eki mámleket kompaniyaları hám tur agentlikleriniń belsene qatnasıwı qospa joybarlardı ámelge asırıw, jańa jónelislerdi jolǵa qoyıw hám regionallıq turizm potencialın jáne de arttırıwǵa xızmet etpekte.

Jaqında paytaxtımızda ótkerilgen “Oraylıq Aziya – Evropa Awqamı” birinshi turizm forumında “Turkmen Travel” kompaniyasınıń wákilleri óz imkaniyatların usındı.
Bul haqqında kompaniya menedjeri Enesh Amangeldiyeva ÓzAnıń xabarshısına tómendegilerdi aytıp berdi:
– Biz xalıqaralıq kórgizbelerdi shólkemlestiriw hám iri ilajlardı ámelge asırıw menen shuǵıllanamız. Sol sebepli, bul forumda Túrkmenstannıń milliy pavilonın shólkemlestirip, imkaniyatlarımızdı birinshi márte usındıq. Biziń qatnasıwımız tikkeley aprel ayında bolıp ótetuǵın “Turkmen Travel” xalıqaralıq kórgizbesine tayarlıqtıń bir bólegi esaplanadı.
2026-jıl 14-16-aprel kúnleri ótkeriletuǵın bul ilaj sheńberinde sırt el kompaniyaları, tur operatorları hám agentlikleri ushın keń imkaniyatlar beriledi. Sonday-aq, bıyıl birinshi márte Ózbekstanda xalıqaralıq turizm kórgizbesin de shólkemlestiriwge kiristik hám biz onıń rásmiy prezentaciyasın ámelge asırmaqtamız. Sonıń ushın, bul jerge kelgenimizdi oǵada áhmiyetli qádem, dep bilemen.
Ashxabadta ótkeriletuǵın kórgizbe haqqındaǵı birinshi rásmiy maǵlıwmattı Ózbekstanda usınıs etkenimizdi atap ótiw kerek. Men forum sheńberinde bolıp ótken ilajlarda spiker sıpatında shıǵıp sóylep, kórgizbeniń maqset hám wazıypaların tolıq túsindirip berdim.
Biziń tur agentliklerimiz de tur ónimlerin tanıstırıw, ózbek turoperatorları menen birge islesiw shártnamalarına qol qoyıw, qospa jónelisler jaratıw, jańa marshrutlar islep shıǵıw maqsetinde qatnastı. Bul óz-ara ámeliy birge islesiw bir waqıtları Jipek jolındaǵı sawda-mádeniy baylanıslardıń izbe-iz dawamı sıpatında oǵada úlken áhmiyetke iye.
Ózbekstan menen shegaralas mámleket sıpatında biziń óz-ara turizm almasıwımız júdá qolaylı hám nátiyjeli bolıp esaplanadı. Ózbek turistleri Túrkmenstannıń tariyxıy hám mádeniy miyras obektlerine qıyınshılıqlarsız baradı. Sonıń ushın da biz milliy pavilonımız benen bul ilajda qatnasıwdı áhmiyetli, tariyxıy qádem, dep qabıl etemiz. Bul jerde Ashxabadtan jeti kompaniya, sonday-aq, Lebap wálayatı hám basqa da aymaqlardan kelgen agentlikler de óz jumısın kórsetti.
Rasın aytsam, nátiyjelerdi kútilgeninen de joqarı bahalayman. Tur operatorlarımız bir qatar ózbek kompaniyaları menen birge islesiw shártnamalarına qol qoydı. Sonday-aq, Yaponiya, Tailand sıyaqlı mámleketlerden kelgen xalıqaralıq qatnasıwshılar da biziń aprel ayındaǵı kórgizbemizde qatnasıwǵa qızıǵıwshılıq bildirip, Ashxabadtaǵı ilaj ushın stendler bánt etti. Bul bolsa eki mámleket arasındaǵı ekonomikalıq hám turizm tarawındaǵı qatnasıqlardı jańa basqıshqa alıp shıǵıwǵa xızmet etedi.
Álbette, kelesi jılı da bul kórgizbede qatnasıwdı rejelestirip atırmız. Shegara máselelerine kelsek, hújjetler boyınsha hesh qanday mashqala júzege kelmedi, eki tárepte de ótiw júdá ańsat ótti. Kelesi jılı Ashxabad-Tashkent tikkeley aviaqatnawları ashıladı, dep úmit etemiz. Házirshe bunday reys joq. Jaqında Prezidentimiz Oraylıq Aziya mámleketleri basshılarınıń sammitinde qatnasqanında bul baǵdar boyınsha kelisimge qol qoyılǵanı da aytıldı. Eger reysler ashılsa, eki mámleket turistleri ushın imkaniyatlar jáne de keńeedi.
Qıyınshılıqlar hújjet yamasa rásmiy talaplarǵa baylanıslı emes, tiykarınan jol infrastrukturasına baylanıslı. Biraq bul birge islesiwimizge kesent etpeydi. Kerisinshe, hár eki mámleket arasındaǵı doslıq qatnasıqlar hám ashıq sóylesiw bizdi jáne de jaqınlastırmaqta.

Nasiba Ziyodullaeva, ÓzA