Рустам Мусурмон,

Қорақалпоғистон халқ шоири

 

Қадим туркий қорақалпоқ тилисан,

Кенг саҳронинг хушнаво булбулисан,

Ҳақ яратган гулистоннинг энг сулув

Гулисан-эй, гулисан-эй, гулисан.

Бу диёрда халқлар яшайди иноқ,

Жонини ҳам аямас келса қўноқ,

Тангри суйган қорақалпоқнинг оппоқ

Дилисан-эй, дилисан-эй, дилисан.

Само ўтовига белдов бовлаган,

Юлдузларни олтин каби товлаган,

Сувдан балиқ, осмондан қуш овлаган

Қўлисан-эй, қўлисан-эй, қўлисан.

Ҳайдар қўйиб, от чоптирган давроннинг,

Довонлардан ошган доно сорбоннинг,

Кўчиб келаётган катта карвоннинг

Йўлисан-эй, йўлисан-эй, йўлисан.

Сеҳр билан сўзга сарпо кийдирган,

Меҳр билан йигит-қизни суйдирган,

Тош кўнгилни моя каби ийдирган

Тилисан-эй, тилисан-эй, тилисан.

Олтиндан ҳам бебаҳо бу тупроқнинг,

Тўрт тури соз бойлик авлоднинг,

Дедим, Рустам, сен ҳам қорақалпоқнинг

Улусанг-эй, улусанг-эй, улусанг!

 

Қорақалпоғистон ахборот агентлиги