Rústam Musurmon,
Qaraqalpaqstan xalıq shayırı.

Áyyemgi túrk – qaraqalpaq tiliseń,
Keń sahranıń xoshhawaz búlbúliseń.
Haq jaratqan gúlistannıń eń sulıw
Gúliseń-áy, gúliseń -áy, gúliseń.

Bul diyarda xalıqlar jasaydı inaq,
Janın da ayamas kelgende qonaq,
Táńri súygen qaraqalpaqtıń appaq
Diliseń-áy, diliseń-áy, diliseń.

Sámen otawına beldew baylaǵan,
Juldızlardı altın yańlı saylaǵan
Suwdan balıq, aspannan qus awlaǵan
Qolısań-áy, qolısań-áy, qolısań.

Aydar qoyıp, at shaptırǵan dáwrannıń,
Taw-ótkelden asqan dana sárwannıń,
Kóship kiyatırǵan úlken kárwannıń
Jolısań-áy, jolısań-áy, jolısań.

Sıyqır menen sózge sarpay kiydirgen,
Mehir menen jigit-qızdı súydirgen,
Tas kewildi maya kibi iydirgen,
Tiliseń-áy, tiliseń-áy, tiliseń.

Altınnan da biybaha bul topıraqtıń,
Tórt túligi say baydáwlet urpaqtıń,
Dedim, Rústem, sen-hám qaraqalpaqtıń
Ulısań-áy, ulısań-áy, ulısań!

Qaraqalpaqshalaǵan: Baxtıyar Genjemuratov.
Qaraqalpaqstan xabar agentligi