Кўпчиликнинг хабари бўлса керак, октябрь ойида Халқаро қиличбозлик федерацияси (FIE) йил якунлари бўйича энг яхши спортчиларнинг рўйхатини эълон қилган эди.

Қувонарлиси, улар орасида икки ҳамюртимиз, сабля бўйича ёшлар ўртасида жаҳон рейтингининг етакчиси, Ўзбекистон терма жамоаси аъзоси Гулистон Пердебаева ушбу йўналишда энг яхши спортчи, ҳакамлик бўйича катта ютуқларга эришаётган Дилором Турдиқулова шпага йўналишида ҳозирги вақтдаги энг яхши 3 ҳакамдан бири сифатида эътироф этилди.

Яқинда Баҳрайн пойтахти Манама шаҳрида FIE вакили В.Логвин ҳамюртимиз Гулистон Пердебаевага эсдалик олтин медалини тантанали равишда топширди.

– Аллоҳ таолога минг бор шукр, қизимнинг бундай юксак мартабага эришганидан жуда хурсандман, – дейди Гулистоннинг онаси, юртимизга машҳур журналист ва олима Тамара Машарипова. – Бунинг учун қизимнинг мураббийларига катта раҳмат айтаман.

Бизлар ҳам ўз навбатида республикамизнинг фахрига айланган бу ажойиб спортчимизни қўлга киритган катта ютуғи билан табриклаб, унинг келгуси мусобақаларда ҳам ғолиб бўлишига тилакдошлик билдирамиз.

Адилбай Оразов,

Қорақалпоғистон ахборот агентлиги шарҳловчиси