Kópshiliktiń xabarı bolsa kerek, oktyabr ayında Xalıqaralıq qılıshlasıw federaciyası (FIE) jıl juwmaqları boyınsha eń jaqsı sportshılardıń dizimin járiyalaǵan edi.

Quwanıshlı tárepi sonda, olardıń arasında eki watanlasımız, sablya boyınsha jaslar arasında jáhán reytinginiń jetekshisi, Ózbekstan saylandı komandasınıń aǵzası Gúlistan Perdebaeva usı baǵdarda eń jaqsı sportshı, tóreshilik boyınsha úlken jetiskenliklerge erisip atırǵan Dilorom Turdıqulova shpaga baǵdarında házirgi waqıttaǵı eń jaqsı 3 tóreshilerden biri sıpatında tán alındı.
Jaqında Baxreyn paytaxtı Manama qalasında FIE wákili V.Logvin jerlesimiz Gúlistan Perdebaevaǵa estelik altın medalın saltanatlı túrde tapsırdı.
– Alla-taalaǵa mıń qátle shúkir, qızımnıń bunday joqarı mártebege eriskenine oǵada quwanıshlıman, -deydi Gúlistannıń anası elimizge belgili jurnalist hám ilimpaz Tamara Masharipova. – Bunıń ushın qızımnıń trenerlerine úlken raxmet aytaman.
Bizler de óz gezeginde respublikamızdıń maqtanıshına aylanǵan bul ájayıp sportshımızdı qolǵa kirgizgen úlken tabısı menen qutlıqlap, onıń aldaǵı jarıslarda da jeńimpaz bolıwına tilekleslik bildirip qalamız.

Adilbay Orazov,
Qaraqalpaqstan xabar agentligi sholıwshısı