Ўзбекистон ўрик етиштириш ва экспорти бўйича дунёда иккинчи ўринда, шунингдек, шафтоли етиштиришда ҳам асосий ўринларни эгалламоқда.

Бу ҳақда Агросаноатни ривожлантириш агентлиги ахборот хизмати раҳбари Ўғилой Болтабоева маълум қилди.

Қайд этилганидек, мамлакатимизда интенсив боғлар кўпаймоқда. 2024-2025 йилларда республика бўйича жами 43,2 минг гектар саноатлашган интенсив мевали боғ ва токзорлар барпо этилмоқда.

Бунда етакчилик қилаётган энг йирик ҳудудлар Наманган, Жиззах, Самарқанд, Сурхондарё, Андижон  вилоятларидир.

Жумладан, юртимизда 9 ойда 1,6 миллион тонна мева маҳсулотлари 1,5 миллиард доллар қийматда 70 дан ортиқ давлатга экспорт қилинди.

Янги боғларнинг 2-3 йил ичида ҳосилга кириши инобатга олинса, яқин 3-5 йилда мева экспорти ҳажми камида 30 фоизга ошиши кутилмоқда.

Маълумотларга кўра, Ўзбекистон ўрик етиштириш бўйича дунёда Туркиядан кейинги иккинчи ўринда бўлса,  ўрик экспорти бўйича Италиядан сўнг иккинчи ўрин эгаллади.

Шунингдек, гилос, узум ва шафтоли экспорти бўйича ҳам етакчи мамлакатлар қаторидамиз.

Гулноза Бобоева, ЎзА