Муносабат

Ўзбекистон Республикаси Президенти Шавкат Мирзиёевнинг Америка Қўшма Штатларига Президент Доналд Трампнинг таклифига биноан 4-6 ноябрь кунлари амалга оширган амалий ташрифи ўзининг тадбирларга бой дастури билан якунланди. Мен, тадбиркор ва масъул депутат сифатида, ушбу ташрифнинг мамлакатимиз иқтисодий тараққиётига, маҳаллий бизнес ривожига ва халқимиз фаровонлигига кўрсатадиган улкан таъсирини чуқур ҳис қиламан. Айниқса, ташриф давомида имзоланган аниқ иқтисодий келишувлар ва бизнес доираларининг фаол мулоқотлари ҳар бир тадбиркор учун катта умид бағишлади.

Президентимизнинг амалий ташрифи, биринчи навбатда, биз тадбиркорлар учун янги, улкан иқтисодий имкониятлар эшигини очди. АҚШ Экспорт-импорт банки (Эксимбанк) раҳбари Жон Йованович ва АҚШ Халқаро молиявий ривожланиш корпорацияси (DFC) бош директори Бен Блэк билан учрашувлар тўғридан-тўғри инвестиция оқимини таъминлашга қаратилгани билан стратегик аҳамиятга эга бўлди. Эксимбанкнинг авиация (шу жумладан, «Boeing» самолётларини етказиб бериш), энергетика, муҳим минераллар, транспорт, қишлоқ хўжалиги ва IТ каби устувор соҳалардаги йирик лойиҳаларни молиялаштиришдаги иштироки, DFC нинг эса ривожланаётган мамлакатларга хусусий капитални жалб қилишдаги фаолияти – Ўзбекистон иқтисодиётига катта ҳажмдаги тўғридан-тўғри инвестициялар оқимини таъминлайди. Тошкентда DFC нинг минтақавий офисини очиш режаси ҳам ушбу молиявий имкониятларни янада яқинлаштириб, маҳаллий тадбиркорлар учун инвестиция лойиҳаларини молиялаштиришда қулай шароитлардан фойдаланиш имконини беради.

«General Motors International»нинг глобал ижрочи директори Шилпан Амин билан музокаралар автомобилсозлик соҳасида фаолият юритаётган маҳаллий компаниялар учун янги кооперация имкониятларини яратди. Охирги 5 йилда 1,6 миллион автомобиль ишлаб чиқарилгани ва Ўзбекистоннинг «Chevrolet» бренди учун АҚШдан кейин иккинчи йирик бозорга айлангани, маҳаллий ишлаб чиқарувчилар учун эҳтиёт қисмлар, хизмат кўрсатиш ва хомашё етказиб бериш бўйича янада кенгайган, барқарор бозор дегани. Маҳаллийлаштиришни чуқурлаштириш ва янги технологияларни жорий этишга қаратилган эътибор Ўзбекистон бизнеси учун инновацион ривожланиш ва рақобатбардошликни ошириш имкониятларини очади.

АҚШ савдо вазири Ховард Латник ва «Traxys», «FLSmidth», «McKinsey», «Meta» «Google», «Amazon», «Boeing» ва бошқа йирик корпорациялар вакиллари билан ўтказилган давра суҳбати нафақат кейинги 8 йилда товар айирбошлаш ҳажмини 4 баробар ошириб, қарийб 1 миллиард долларга етказиш имконини берди, балки истиқболдаги савдо-инвестиция алоқаларининг янада мустаҳкамланишига замин яратди. Президент Шавкат Мирзиёев иштирокида имзоланган 9 та муҳим икки томонлама битим ва шартнома бунга яққол мисолдир.

Ушбу келишувлар Ўзбекистон иқтисодиётининг турли тармоқларида – тоғ-кон, энергетика, қишлоқ хўжалиги, транспорт, IТ каби соҳаларда тадбиркорлик фаолиятини ривожлантириш учун янги, улкан имкониятлар яратади. Айниқса, Президентимизнинг 2030 йилга бориб 18-20 гигаватт қайта тикланувчи энергия қувватига эга янги энергетика тизимини яратиш, электр энергиясининг ярмини қуёш ва шамол ҳисобидан ишлаб чиқариш режаси, транспорт инфратузилмасини ривожлантиришга 12 миллиард доллардан зиёд маблағ йўналтириш, Google, Meta, NVIDIA каби гигантлар билан рақамли ҳамкорликни кенгайтириш – буларнинг барчаси биз, тадбиркорлар учун янги бизнес ғояларни амалга ошириш ва глобал миқёсдаги инновацион лойиҳаларда иштирок этиш учун мустаҳкам пойдевордир.

Президент Шавкат Мирзиёевнинг Оқ уйда АҚШ Президенти Доналд Трамп билан музокаралари икки мамлакат ўртасидаги стратегик шерикликнинг иқтисодий таркибий қисмини яна бир бор тасдиқлади. Глобал ва минтақавий аҳамиятга молик масалалар, жумладан, «С5+1» форматида Марказий Осиё ва АҚШ ўртасидаги ҳамкорликни чуқурлаштириш юзасидан фикр алмашиш Ўзбекистоннинг минтақавий иқтисодий интеграцияга интилишини намоён этди. «С5+1» доирасида таклиф этилган доимий Котибият, Инвестициялар ва савдо бўйича мувофиқлаштирувчи кенгаш, «Марказий Осиё инвеститсиявий шериклик» жамғармаси, муҳим минералларни чуқур қайта ишлаш бўйича махсус қўмита ва минтақавий агротехнологик инновациялар шериклиги – булар барча иштирокчи мамлакатларнинг иқтисодий ўсиши учун мустаҳкам институтсионал ва молиявий асос яратади. Навбатдаги саммитни Самарқандда ўтказиш таклифи эса мамлакатимизнинг минтақавий ва глобал иқтисодий жараёнлардаги фаол ролини янада оширади.

Давлатимиз раҳбарининг АҚШга амалий ташрифининг тадбирларга бой дастури якуни билан Ўзбекистон Республикасининг халқаро майдондаги иқтисодий нуфузи янада ошди. Ташриф Ўзбекистон ва АҚШ ўртасидаги муносабатларда янги, янада прагматик ва иқтисодий жиҳатдан манфаатли саҳифа очди. Ушбу ташриф орқали эришилган келишувлар ва белгиланган режаларнинг амалга оширилиши Янги Ўзбекистон иқтисодиётини янада фаровон ва қудратли мамлакатга айлантиришда муҳим роль ўйнайди.

Сарсенбай Қалжанов,

Халқ депутатлари Нукус шаҳар кенгаши депутати.

Қорақалпоғистон ахборот агентлиги