Анқара ва Лондон 20 та “Eurofighter Typhoon” қирувчи самолётларини харид қилиш бўйича 9 миллиард евро қийматидаги келишувни имзолади, деб хабар бермоқда “Euronews” нашри.

Битим Британия бош вазири Кир Стармернинг Туркияга илк ташрифи чоғида имзоланди. У президент Режеп Таййип Эрдоған билан биргаликда маросимда иштирок этди.

– Биз Европанинг қарама-қарши томонларида жойлашганмиз, аммо бугун ҳар қачонгидан ҳам яқин ҳамкорлармиз, — деди Стармер. – Ушбу ҳужжат НАТО хавфсизлигини мустаҳкамлайди, мудофаа соҳасидаги ҳамкорлигимизни чуқурлаштиради ва иккала мамлакат иқтисодиётига фойда келтиради.

Мулозимнинг сўзларига кўра, келишув Буюк Британияда 20 мингта иш ўрнини сақлаб қолади ва келажакда Туркияга қўшимча самолётлар сотиш имкониятини ҳам беради.

Эрдоған бу битимни “икки яқин иттифоқчи давлатлар ўртасидаги стратегик алоқаларнинг янги рамзи” деб атади.

Маълумот ўрнида: “Eurofighter” самолётларини Буюк Британия, Германия, Италия ва Испания қўшма ҳамкорликда ишлаб чиқади. Лойиҳа Бирлашган Қиролликнинг “BAE Systems” компанияси томонидан бошқарилади. ГФР яқинда Туркияга бу самолётларни сотишга қўйилган узоқ йиллик ветосини бекор қилган эди.

Анқара шунингдек, Қатар ва Ўмондан 24 та ”Typhoon” самолётини сотиб олишни режалаштирмоқда. Шу билан бирга, ўлка АҚШ бошчилигидаги Ф-35 дастурига қайтишни мўлжалламоқда. Туркия 2019 йилда Россиядан С-400 мудофаа тизимини харид қилгани учун бу дастурдан чиқарилган эди.

Мусулмон Зиё, ЎзА