Anqara hám London 20 “Eurofighter Typhoon” qırıwshı samolyotların satıp alıw boyınsha 9 milliard evro bahasındaǵı kelisimge qol qoydı, dep xabar bermekte “Euronews” basılımı.

Kelisimge Britaniya bas ministri Kir Starmerdiń Túrkiyaǵa dáslepki saparı waqtında qol qoyıldı. Ol Prezident Rejep Tayyip Erdoǵan menen birgelikte máresimde qatnastı.
– Biz Evropanıń qarama-qarsı táreplerinde jaylasqanbız, biraq búgin hár qashanǵıdan da jaqın sheriklerimiz, – dedi Starmer. – Bul hújjet NATO qáwipsizligin bekkemleydi, qorǵanıw tarawındaǵı birge islesiwimizdi tereńlestiredi hám eki mámleket ekonomikasına payda keltiredi.
Rásmiy adamlardıń sózlerine bola, kelisim Ullı Britaniyada 20 mıń jumıs ornın saqlap qaladı hám keleshekte Túrkiyaǵa qosımsha samolyotlar satıw imkaniyatın da beredi.
Erdoǵan bul kelisimdi “eki jaqın awqamlas mámleket arasındaǵı strategiyalıq baylanıslardıń jańa belgisi” dep atadı.
Maǵlıwmat ornında: “Eurofighter” samolyotların Ullı Britaniya, Germaniya, Italiya hám Ispaniya birgelikte islep shıǵadı. Joybar Birlesken Patshalıqtıń “BAE Systems” kompaniyası tárepinen basqarıladı. GFR jaqında Túrkiyaǵa bul samolyotlardı satıwǵa qoyılǵan uzaq jıllıq vetonı biykar etken edi.
Anqara sonday-aq, Qatar hám Omannan 24 “Typhoon” samolyotın satıp alıwdı rejelestirmekte. Sonıń menen birge, mámleket AQSh basshılıǵındaǵı F-35 baǵdarlamasına qaytıwdı mólsherlemekte. Túrkiya 2019-jılı Rossiyadan S-400 qorǵanıw sistemasın satıp alǵanı ushın bul baǵdarlamadan shıǵarılǵan edi.

Musulmon Ziyo, ÓzA