Сўнгги йилларда мамлакатимизда юк ташиш ҳажмининг ортиб бориши билан бир қаторда, оғир тоннали транспорт воситаларининг йўлларга кўрсатаётган салбий таъсири ҳам кучаймоқда. Натижада, автомобиль йўлларининг тезда ишдан чиқиши, ҳаракат хавфсизлигининг пасайиши каби муаммолар юзага келмоқда.

Шу боис, ҳукумат томонидан оғир ва йирик ҳажмли юк ташувчиларнинг ҳаракатини тартибга солиш ҳамда йўл инфратузилмасини узоқ муддат хизмат қилишини таьминлаш   мақсадида янги тартиб жорий этилди.

Хусусан, Вазирлар Маҳкамасининг 2024 йил 28 октябрдаги 710-сон қарорига биноан, рухсатсиз ёки белгиланган меъёрлардан ортиқ юк билан ҳаракатланган транспорт воситалари йўл қопламасига етказган зарарни қуйидаги миқдорларда қоплайди:

50 тоннагача — базавий ҳисоблаш миқдорининг 30 фоизи;

80 тоннагача — 1 баробари;

80 тоннадан ортиқ — 3 баробари миқдорида, ҳар бир босиб ўтилган километр учун.

Агар босиб ўтилган масофани аниқлашнинг иложи бўлмаса, зарар 200 километр учун ҳисобланади.

Янги тартибга кўра, йўлларга етказилган зарар Транспорт вазирлиги ҳузуридаги Транспорт назорати инспекцияси ҳамда Автомобиль йўллари қўмитаси томонидан ундирилади.

Мутахассисларнинг қайд этишича, оғир юк ортилган транспорт воситаларининг ортиб бораётган ҳаракати автомобиль йўлларининг тезроқ ҳаракат учун яроқсиз ҳолатга келишига сабаб бўлмоқда. Шу боис, янги тизим йўлларни асраш, уларнинг хизмат муддатини узайтириш ва ҳаракат хавфсизлигини таъминлашга хизмат қилади.

Ҳамроз Баянов,

ЎзА