Keyingi jılları mámleketimizde júk tasıw kóleminiń artıp barıwı menen bir qatarda, awır tonnalı transport qurallarınıń jollarǵa kórsetip atırǵan unamsız tásiri de kúsheymekte. Nátiyjede, avtomobil jollarınıń tez isten shıǵıwı, háreket qáwipsizliginiń tómenlewi sıyaqlı mashqalalar júzege kelmekte.

Sonlıqtan, húkimet tárepinen awır hám iri kólemli júk tasıwshılardıń háreketin tártipke salıw jáne jol infrastrukturasınıń uzaq múddet xızmet etiwin támiyinlew maqsetinde jańa tártip engizildi.
Atap aytqanda, Ministrler Kabinetiniń 2024-jıl 28-oktyabrdegi 710-sanlı qararına bola, ruqsatısız yamasa belgilengen normalardan artıq júk penen háreketlengen transport quralları jol qaplamasına jetkergen zıyandı tómendegi muǵdarlarda qaplaydı:
50 tonnaǵa shekem – bazalıq esaplaw muǵdarınıń 30 procenti;
80 tonnaǵa shekem – 1 ese;
80 tonnadan artıq – 3 ese muǵdarında, hár bir basıp ótilgen kilometr ushın.
Eger basıp ótilgen aralıqtı anıqlaw múmkin bolmasa, zıyan 200 kilometr ushın esaplanadı.
Jańa tártipke bola, jollarǵa jetkerilgen zıyan Transport ministrligi janındaǵı Transport qadaǵalawı inspekciyası hám Avtomobil jolları komiteti tárepinen óndiriledi.
Qánigelerdiń atap ótiwinshe, awır júk artılǵan transport qurallarınıń artıp baratırǵan háreketi avtomobil jollarınıń tezirek háreketleniw ushın jaramsız jaǵdayǵa kelip qalıwına sebep bolmaqta. Sonlıqtan, jańa sistema jollardı saqlaw, olardıń xızmet múddetin sozıw hám háreket qáwipsizligin támiyinlewge xızmet etedi.

Hamroz Bayanov, ÓzA