Аввал хабар берганимиздек, Россия федерациясининг Чуваш Республикаси Новочебоксарск шаҳрида спортнинг Белбоғли кураш тури бўйича катталар ўртасида Жаҳон кубоги ва Осиё чемпионати бўлиб ўтмоқда.

Ушбу мусобақада Ўзбекистон терма жамоаси таркибида республикамиз спортчилари муваффақиятли тарзда иштирок этмоқда.

Хусусан, жаҳон кубоги мусобақасида 52 кг вазнда Барно Қалмуратова кумуш, 58 кг вазнда Земфира Азатова бронза медалини қўлга киритган бўлса, Осиё чемпионатида республикамиз полвонларидан 57 кг вазнда Жанарис Шинбатиров, 52 кг да Молдир Алимбаева ва 58 кг да Шахло Қалмуратовалар олтин, 62 кг да Ринат Муратбаев бронза медалларига лойиқ деб топилди.

Шу тариқа, республикамиз полвонлари жаҳон кубоги баҳсларида 1 кумуш ва 1 бронза, Осиё чемпионатида 3 олтин ва 1 бронза медалларини қўлга киритиб, Ўзбекистон терма жамоасининг ғалабасига ўзларининг салмоқли ҳиссасини қўшди.

Ғолиб спортчиларни бу мусобақага Бокенбай Садвақасов тайёрлади.

Адилбай Оразов,

Қорақалпоғистон ахборот агентлиги шарҳловчиси