Aldın xabar bergenimizdey, Rossiya federaciyasınıń CHuvash Respublikası Novocheboksarsk qalasında sporttıń Belbewli gúres túri boyınsha eresekler arasında Jáhán kubogi hám Aziya chempionatı bolıp ótpekte.

Bul jarısqa Ózbekstan saylandı komandası quramında respublikamız sportshıları tabıslı túrde qatnaspaqta.
Atap aytqanda, jáhán kubogi jarısında 52 kg salmaqta Barno Qalmuratova gúmis, 58 kg salmakta Zemfira Azatova qola medalın jeńip alǵan bolsa, Aziya chempionatında respublikamız palwanlarınan 57 kg salmaqta Janarıs Shınbatırov, 52 kg da Móldir Alimbaeva hám 58 kg da Shaxlo Qalmuratovalar altın, 62 kg da Rinat Muratbaev qola medallarına ılayıq dep tabıldı.
Solay etip, respublikamız palwanları jáhán kubogi bellesiwlerinde 1 gúmis hám 1 qola, Aziya chempionatında 3 altın hám 1 qola medalların qolǵa kirgizip, Ózbekstan saylandı komandasınıń jeńisine ózleriniń salmaqlı úlesin qostı.
Jeńimpaz sportshılardı bul jarısqa Bókenbay Sádwaqasov tayarladı.

Adilbay Orazov,
Qaraqalpaqstan xabar agentligi sholıwshısı