Вена шаҳридаги тарихий Шёнбрунн саройида Ўзбекистоннинг туризм салоҳияти намойиш этилди.

Тадбирда Австрия давлат ташкилотлари, илмий доиралар, халқаро тузилмалар, дипломатик корпус ва кенг жамоатчилик вакиллари, шунингдек, Ўзбекистон Республикаси Олий Мажлис Қонунчилик палатаси делегацияси иштирок этди.

Ўзбекистоннинг Австриядаги Фавқулодда ва Мухтор элчиси Бахтиёр Ибрагимов туризмнинг мамлакат иқтисодиётидаги ўрни, бой маданий-тарихий меросимиз, шу жумладан, ЮНЕСКО рўйхатига киритилган объектлар, туризм соҳасидаги янгиланишлар ҳақида маълумот берди.

Ўзбекистоннинг Австриядаги туризм бренди элчиси Гертруда Таухаммер бу каби ташаббусларнинг маданият ва туризм соҳаларидаги ўзаро алоқаларни кенгайтиришда муҳим аҳамият касб этишини таъкидлаб, бундай тадбирларни мунтазам ўтказиш таклифини билдирди.

Тадбирда сўзга чиққан Австриянинг Ўзбекистондаги элчиси Маттиас Радостич юртимизда, айниқса, иқтисодиёт соҳасида амалга оширилаётган кенг кўламли ислоҳотлар ҳақида тўхталиб, Ўзбекистон ҳорижий сайёҳлар учун энг жозибадор йўналишлардан бири эканлигини қайд этди ва тадбир иштирокчиларини мамлакатимизга таклиф этди.

Тақдимот доирасида ташкил этилган миллий тўқимачилик ва ипакдан тайёрланган буюмлар кўргазмаси меҳмонларга ўзбек ҳунармандчилигининг бой анъаналари билан яқинроқ танишиш имконини берди.

Азиза Алимова тайёрлади, ЎзА