Муносабат

Ўзбекистон Республикаси Президенти Шавкат Мирзиёевнинг БМТ Бош Ассамблеясининг 80-юбилей сессиясида нутқ сўзлаши бутун халқимизни, жумладан, педагогларни хурсанд қилади. Зеро, мамлакатимиз Президенти катта минбардан туриб, халқаро аҳамиятга молик таклифларни билдириб ўтди.

Айниқса, мамлакатимизда устозга кўрсатилаётган ғамхўрликларни БМТ минбаридан тинглар эканмиз, биз устозлар ўз касбий маҳоратимизни янада ошириб, бола тарбиясидек шарафли ишда масъулиятимизни янада кучайтиришимиз кераклигини ҳис қилмоқдамиз.

Президент Шавкат Мирзиёев ўз маърузасида мамлакатимиздаги янгиланишларга алоҳида тўхталди. Сўнгги йилларда Ўзбекистонда камбағаллик даражасини 35 фоиздан 6,6 фоизга қисқартиришга эришилгани таъкидланди. Бунга, энг аввало, таълим ва илм-фан соҳасини ўзгартириш, инновацион тармоқлар ва технологик саноат корхоналарини барпо этиш, «яшил» энергетика ва транспорт инфратузилмасини модернизация қилиш, кичик бизнесни ҳар томонлама ривожлантириш ва натижада миллионлаб иш ўринлари яратиш орқали эришилмоқда.

Мамлакатимизда мактабгача таълим қамрови 27 фоиздан 78 фоизга ошгани, ёшларимизнинг олий таълимга қамрови эса 9 фоиздан 42 фоизга кўпайгани қайд этилди.

Хусусий боғчаларда тарбиячилар ойлиги ва бола харажатининг бир қисми бюджетдан қоплаб берилади.

Ўқувчи мактабда таълим олиши билан бирга касбга ёки олий ўқув юртига киришга йўналтирилади. 400 минг ўқувчи техникумларга жалб қилинади. 10-11-синф мактаб ўқувчиларига йўналиши бўйича фанлар чуқурлаштириб ўқитилади. Мактаб ўқувчиларининг чет тили ва фанлар бўйича олган сертификатлари мактабдаги якуний имтиҳонларда тан олинади.

2026 йил ёшларни замонавий касб-ҳунарга ўргатиш йили бўлиб, шу мақсадда Касб-ҳунар таълими агентлиги ташкил этилади.

Мактабларда маслаҳатчи лавозими жорий этилиб, ўқувчилар 7-синфдан бошлаб фанларни ўзлаштириши ва касбга қизиқиши бўйича танлаб олиниб, 9-синфларни битиргач техникумларга йўналтирилади.

Жорий йилда ўқишга кира олмаган 200 минг нафар ёшлар техникумларда 3-6 ойлик қисқа муддатли дастурлар асосида касбга ўқитилади.

Энди янги йилдан бошлаб 15 йил иш стажига эга бўлган олий тоифали ўқитувчиларга ипотека кредити бошланғич бадалининг 25 фоизи қоплаб берилади.

Келгуси ўқув йилидан бошлаб, давлат таълим муассасаларига кирган педагогларнинг фарзандларига 30 фоиз чегирма берилади. Ўқитувчилар янги таълим технологияларини кенг қўллаши учун компьютер сотиб олиш учун 10 млн.гача имтиёзли кредит берилади.

Келгуси йилдан бошлаб, педагоглар учун давлат хизматлари тўлови 2 баробар камайтирилади ҳамда фан ўқитувчилари каби бошланғич синф ўқитувчилари учун Миллий сертификат олганларга ҳар ойда 15 фоиз устама тўланади.

Буларнинг барчаси бизнинг юртимизда инсон қадри ҳамма нарсадан устун эканлигининг, таълим соҳасини ривожлантиришга қаратилган алоҳида эътибор, келажак авлоднинг билимли инсонлар бўлиб чиқиши ҳамда устоз ва мураббийлар меҳнатини қадрлаш эканлигининг яққол ифодасидир.

Оралхон Сапарова, Нукус шаҳридаги 34-сонли мактабнинг директори,
Ўзбекистон халқ таълими аълочиси,
халқ депутатлари Нукус шаҳар Кенгаши депутати