Múnásibet

Ózbekstan Respublikası Prezidenti Shavkat Mirziyoev BMSh Bas Assambleyasınıń 80-yubiley sessiyasında shıǵıp sóylewi pútkil xalqımızdı, sonıń ishinde pedagoglardı quwanıshqa bóledi. Sebebi, mámleketimiz Prezidenti úlken minberde turıp, xalıqaralıq áhmiyetke iye usınıslardı bildirip ótti.
Ásirese, mámleketimizde ustazǵa kórsetilip atırǵan ǵamqorlıqlardı BMSh minberinen tıńlar ekenbiz, biz ustazlar ele de óz professionallıq sheberligimizdi asırıp, bala tárbiyasınday ádiwli iste juwapkershiligimizdi elede kúsheytiw kerek ekenligimizdi sezinbektemiz.
Prezident Shavkat Mirziyoev óz bayanatında mámleketimizdegi jańalanıwlarǵa ayrıqsha toqtap ótti. Sońǵı jıllarda Ózbekstanda kámbaǵallıq dárejesin 35 procentten 6,6 procentke shekem qısqartıwǵa erisilgeni atap ótildi. Oǵan, eń dáslep, bilimlendiriw hám ilim tarawın ózgertiw, innovaciyalıq tarmaqlar hám texnologiyalıq sanaat kárxanaların qurıw, “jasıl” energetika hám transport infrastrukturasın modernizaciyalaw, kishi biznesti hár tárepleme rawajlandırıw hám nátiyjede millionlaǵan jumıs orınların jaratıw arqalı erisilmekte.
Mámleketimizde mektepke shekemgi bilimlendiriwge qamtıp alıw 27 procentten 78 procentke artqanı, jaslarımızdıń joqarı bilimlendiriwge qamtıp alınıwı bolsa 9 procentten 42 procentke jetkeni atap ótildi. Eń tiykarǵısı – oqıtıwshı hám ustazlıq kásibiniń abıray-mártebesin keskin arttırıwǵa sheshiwshi másele sıpatında qaralmaqta.
Jeke baqshalarda tárbiyashılar aylıǵı hám bala qárejetiniń bir bólegi byudjetten qaplap beriledi.
Oqıwshı mektepte bilim alıwı menen birge qásipke yamasa joqarı oqıw ornına kiriwge baǵdarlanadı. 400 mıń oqıwshı texnikumlarǵa tartıladı. 10-11-klasstı mektepte oqıytuǵın oqıwshılarǵa jónelisi boyınsha pánler tereńlestirilip oqıtıladı. Mektep oqıwshılarınıń shet tili hám pánler boyınsha alǵan sertifikatları mekteptegi juwmaqlawshı imtixanlarda tán alınadı.
2026-jıl jaslardı zamanagóy qásip-ónerge úyretiw jılı bolıp, usı maqsette Kásiplik tálim agentligi shólkemlestiriledi.
Mekteplerde másláhatshi lawazımı engizilip, oqıwshılar 7-klasstan baslap pánlerdi ózlestiriwi hám qásipke qızıǵıwı boyınsha tańlap alınıp, 9-klasslardı pitkergeninde texnikumlarǵa baǵdarlanadı.
Usı jılı oqıwǵa kire almaǵan 200 mıń jas texnikumlarda 3-6 aylıq qısqa múddetli baǵdarlamalar tiykarında qásipke oqıtıladı.
Endi jańa jıldan baslap 15 jıl stajǵa iye bolǵan joqarı kategoriyası bar muǵallimlerge ipoteka kreditiniń baslanǵısh tóleminiń 25 procenti qaplanıp beriledi.
Kelesi oqıw jılınan baslap, mámleketlik oqıw orınlarına kirgen pedagoglardıń perzentlerine 30 procent shegirme beriledi. Oqıtıwshılar jańa tálim texnologiyaların keńnen qollanıwı ushın kompyuter satıp alıw ushın 10 mln. ǵa shekem jeńilletilgen kredit beriledi.
Kelesi jıldan baslap pedagoglar ushın mámleketlik xızmetler tólemi 2 ese kemeyttiriledi hám pán muǵallimleri sıyaqlı baslawısh klass muǵallimleri ushın Milliy sertifikat alǵanlarǵa hár ayda 15 procent ústeme tólenedi.
Bulardıń bári biziń elimizde insan qádiri barlıq nárseden ústin ekenliginiń, bilimlendiriw tarawın rawajlandırıwǵa qaratılǵan ayrıqsha itibar, keleshek áwladtıń bilimli insanlar bolıp shıǵıwı sonday-aq, ustazlar hám muǵallimlerdiń miynetin qádirlew ekenliginiń ayqın kórinisi esaplanadı.

Oralxan Saparova, Nókis qalasındaǵı 34-sanlı mekteptiń direktorı, Ѳzbekstan xalıq bilimlendiriwi aǵlası, xalıq deputatları Nѳkis qalalıq Keńesiniń deputatı