Амударё тумани Шайкўл овул фуқаролар йиғини ҳудудида жойлашган «Манғит Омад Савдо» МЧЖ 2019 йилда ташкил этилган бўлиб, бугунги кунда ўзининг 12 гектар ер майдонига эга. Шундан 8 гектарига ток кўчатлари экилиб, уларнинг 7 гектаридан бир неча йиллардан буён мўл ҳосил олинмоқда.

– Еримизнинг 7 гектарига узумнинг «Тайпи» нави экилган бўлиб, етиштирилаётган маҳсулот Қозоғистон ва Россия давлатларига экспорт қилинмоқда, – дейди жамият раиси Азимжон Жумамуратов. – Шунингдек, 1 гектар майдонга узумнинг «Аватар» нави экилиб, ундан келгуси йилдан бошлаб ҳосил оламиз. Ўтган йили 100 тонна узум экспорт қилган эдик. Бу йил ҳам шу тарзда ишларимизни давом эттирамиз.

Шуни айтиб ўтишимиз керакки, бугунги кунда Амударё туманида 61 та қишлоқ хўжалиги корхонаси боғдорчилик ва узумчилик билан шуғулланиб келмоқда.

Уларнинг умумий майдони 1046 гектарни ташкил этиб, шундан 641 гектари ҳосилдор боғлар, 405 гектари эса, янги барпо этилган боғлардир.

Шундан жорий йилда фермер хўжаликлари ва қишлоқ хўжалиги корхоналари томонидан 76 гектар майдонда интенсив боғлар ташкил этилди.

Бу эса туманда боғдорчилик ва узумчилик тобора ривожланиб бораётганини кўрсатади. Энг асосийси, бу ерларда одамлар доимий ва мавсумий иш билан таъминланиб, уларнинг даромадлари ошмоқда.

Қорақалпоғистон ахборот агентлиги