Ámiwdárya rayonı Shaykól awıl puqaralar jıyını aymaǵında jaylasqan “Manǵıt Omad Savdo” JShJ 2019-jılı shólkemlestirilgen bolıp, búgingi kúni óziniń 12 gektar jer maydanına iye. Sonnan 8 gektarında júzim nálleri egilip, olardıń 7 gektarınan bir neshe jıllardan berli mol ónim alıp kelinbekte.

– Jerimizdiń 7 gektarına júzimniń “Taypi” sortı egilgen bolıp, jetistirilip atırǵan ónim Qazaqstan hám Rossiya mámleketlerine eksport etilmekte, – deydi jámiyet baslıǵı Azimjan Jumamuratov. – Sonday-aq, 1 gektar maydanǵa júzimniń “Avatar” sortı egilip, onnan kelesi jıldan baslap ónim alamız. Ótken jılı 100 tonna júzim eksport etken edik. Bıyıl da usı taqılette jumıslarımızdı dawam ettiremiz.
Sonı aytıp ótiwimiz kerek, búgingi kúni Ámiwdárya rayonında 61 awıl xojalıǵı kárxanası baǵshılıq hám júzimgershilik penen shuǵıllanıp kelmekte.
Olardıń ulıwma maydanı 1046 gektardı qurap, sonnan 641 gektarı zúráátli baǵlar, 405 gektarı bolsa, jańadan payda etilgen baǵlar bolıp esaplanadı.
Sonnan bıyılǵı jılı fermer xojalıqları hám awıl xojalıǵı kárxanaları tárepinen 76 gektar maydanda intensiv baǵlar shólkemlestirildi.
Bul bolsa, rayonda baǵshılıq hám júzimgershiliktiń alǵa qaray rawajlanıp baratırǵanın kórsetedi. Eń tiykarǵısı bul jerlerde adamlar turaqlı hám máwsimlik jumıs penen támiyinlenip, olardıń dáramatları artpaqta.

Qaraqalpaqstan xabar agentligi