Беруний тумани О. Жуманиязов маҳалла фуқаролар йиғини ҳудудида жойлашган «Жуманиязов 67» фермер хўжалиги боғдорчиликка ихтисослашган бўлиб, умумий 8,7 гектар ер майдонига эга.

Шундан 4 гектарига ўрик, 3 гектарига олма ва 1,5 гектарига анор экилган.

Фермер хўжалиги раҳбари Рустам Хажибоевнинг таъкидлашича, хўжаликда асосан анорнинг 6 тури экилган бўлиб, уларнинг ҳар бир гектаридан ўртача 25-30 тоннагача ҳосил олинмоқда. Бу эса хўжаликка йилига 450-500 миллион сўм даромад келтирмоқда.

– Боғимизда етиштирган анорларимизнинг бир килограммини 15 минг сўмдан улгуржи сотиб оляпти, – дейди фермер Рустам Ҳожибоев.

Фермер хўжалигида бугунги кунда 10 киши доимий иш билан таъминланиб, мева терими ва кўчатларни кўмиш мавсумида кунига 20-30 киши мавсумий ишламоқда.

Ҳозирги кунларда хўжалик далаларида пишиб етилган анорларни Қорақалпоғистоннинг барча ҳудудларидан келиб, улгуржи тарзда сотиб олиб кетмоқда.

«Меҳнатнинг таги роҳат» дегани шу бўлса керак.

Адилбай Оразов,

Қорақалпоғистон ахборот агентлиги шарҳловчиси