Beruniy rayonı O. Jumaniyazov mákan puqaralar jıyını aymaǵında jaylasqan «Jumaniyazov 67»  fermer xojalıǵı baǵshılıqqa qánigelesken bolıp, ulıwma 8,7 gektar jer maydanına iye.

Sonnan 4 gektarına erik, 3 gektarına alma hám 1,5 gektarına ánar egilgen.

Fermer jojalıǵı baslıǵı Rustam Xajiboevtiń atap ótiwinshe, xojalıqta tiykarınan ánardıń 6 túri egilgen bolıp, olardıń hár bir gektarınan ortasha 25-30 tonnaǵa shekem ónim alınbaqta. Bul bolsa, xojalıqqa jılına 450-500 million som dáramat alıp kelmekte.

-Baǵımızda jetistirgen ánarlarımızdıń hár kilogrammın 15 mıń sumnan kótere satıp almaqta,-deydi fermer Rustam Xajiboev.-Eger, hár bir xojalıq 200 túp ánar egip tárbiyalasa, onda jetistirilgen ónim menen bir shańaraqtı qıynalmastan támiyinlew múmkin.

Fermer xojalıǵında búgingi kúni 10 adam turaqlı jumıs penen támiyinlenip, miywe terimi hám nállerdi kómiw máwsiminde kúnine 20-30 adam máwsimlik jumıs islep atır.

Házirgi kúnleri xojalıq atızlarında pisip jetilgen ánarlardı Qaraqalpaqstannıń barlıq aymaqlarınan kelip, kótere túrde satıp alıp ketpekte.

«Miynet túbi-ráhát» degen usı bolsa, kerek.

Adilbay Orazov,

Qaraqalpaqstan xabar agentligi sholıwshısı.