Ананас – тропик минтақалардан келиб чиққан, мазали ва фойдали мева бўлиб, бутун дунёда кенг истеъмол қилинади. Бу мева C витамини, антиоксидантлар ва ҳазм қилиш тизимини яхшиловчи бромелаин ферменти билан бой. Шу сабабли, ананас нафақат таъм учун, балки соғлиқ учун ҳам қадрланади. У иммунитетни мустаҳкамлаш, яллиғланишни камайтириш ва терининг ҳолатини яхшилашда ёрдам беради. Ўзбекистон каби ўрта иқлим шароитига эга давлатларда эса ананасни маҳаллий ишлаб чиқариш имкониятлари чеклангани сабабли, бу мева асосан импорт орқали етказиб берилади.

Миллий статистика қўмитаси маълумотларига кўра, 2025 йилнинг биринчи ярим йиллигида Ўзбекистонга хорижий мамлакатлардан қиймати 1,6 миллион АҚШ долларига тенг бўлган 4,6 минг тонна ананас импорт қилинган. Бу кўрсаткич 2024 йилнинг мос даврига нисбатан 2,2 минг тоннага ошган, яъни ананас импорти қарийб икки баробар кўпайган.

Энг кўп ананас етказиб берган давлатлар рўйхатида Хитой етакчи бўлиб, жами 4,5 минг тонна ананас импорт қилинган. Шунингдек, Қозоғистон – 92 тонна, Нидерландия – 16 тонна, Мексика – 5 тонна билан Ўзбекистонга ананас етказиб беришда фаол қатнашмоқда.

Бу импорт ҳажмининг ошишини истеъмолчиларнинг соғлом турмуш тарзига қизиқиши, тропик ва фойдали меваларга талабнинг ошгани билан изоҳлаш мумкин. Қолаверса, савдо алоқаларининг ривожланиши, Хитой ва бошқа давлатлар билан савдо муносабатларининг мустаҳкамланиши импорт ҳажмининг ошишига сабаб бўлмоқда.

Келгусида ананас импортининг ошиши мамлакатда турли тармоқлар – чакана савдо, озиқ-овқат саноати, шунингдек соғлом овқатланишга оид хизматлар учун ижобий ўзгаришлар келтириши кутилмоқда. Шу билан бирга, ички ишлаб чиқаришни ривожлантириш ва импортга қарамликни камайтириш учун иқлимга мос янги инновацион усулларни жорий этиш мумкин.

Дилдора ДЎСМАТОВА

ЎзА