Ananas – tropikalıq regionlardan kelip shıqqan, mazalı hám paydalı miywe bolıp, pútkil dúnya júzi boylap keń paydalanıladı. Bul miywe S vitamini, antioksidantlar hám as sińiriw sistemasın jaqsılawshı bromelain fermentine bay. Sol sebepli, ananas tek ǵana dám ushın emes, al densawlıq ushın da qádirlenedi. Ol immunitetti bekkemlew, isiniwdi kemeytiw hám teriniń jaǵdayın jaqsılawǵa járdem beredi. Ózbekstan sıyaqlı ortasha klimat sharayatına iye mámleketlerde bolsa ananastı jergilikli islep shıǵarıw imkaniyatları sheklengeni sebepli, bul miywe tiykarınan import arqalı jetkerip beriledi.

Milliy statistika komitetiniń maǵlıwmatlarına bola, 2025-jıldıń birinshi yarım jıllıǵında Ózbekstanǵa sırt mámleketlerden bahası 1,6 million AQSh dollarına teń bolǵan 4,6 mıń tonna ananas import etilgen. Bul kórsetkish 2024-jıldıń usı dáwirine salıstırǵanda 2,2 mıń tonnaǵa artqan, yaǵnıy ananas importı derlik eki esege kóbeygen.
Eń kóp ananas jetkerip bergen mámleketler diziminde Qıtay jetekshi bolıp, jámi 4,5 mıń tonna ananas import etilgen. Sonday-aq, Qazaqstan – 92 tonna, Niderlandiya – 16 tonna, Meksika – 5 tonna menen Ózbekstanǵa ananas jetkerip beriwde belsene qatnaspaqta.
Bul import kóleminiń artıwın tutınıwshılardıń salamat turmıs tárizine qızıǵıwshılıǵı, tropikalıq hám paydalı miywelerge talaptıń artqanı menen túsindiriw múmkin. Qalaberdi, sawda baylanıslarınıń rawajlanıwı, Qıtay hám basqa da mámleketler menen sawda qatnasıqlarınıń bekkemleniwi import kóleminiń artıwına sebep bolmaqta.
Keleshekte ananas importınıń artıwı mámlekette hár qıylı tarmaqlar – usaqlap satıw, azıq-awqat sanaatı, sonday-aq, salamat awqatlanıwǵa baylanıslı xızmetler ushın unamlı ózgerisler alıp keliwi kútilmekte. Sonıń menen birge, ishki óndiristi rawajlandırıw hám importqa baylanıslılıqtı azaytıw ushın klimatqa say jańa innovaciyalıq usıllardı engiziw múmkin.

Dildora DWSMATOVA.
ÓzA