Япония Бош вазири Сигэру Исиба билан бўлиб ўтган саммит чоғида Жанубий Корея Президенти Ли Чже Мён кун чиқар мамлакат етакчисини глобал савдо шароити ўзгариб бораётган бир пайтда яқинроқ ҳамкорликни йўлга қўйишга чақирди. Бу ҳақда “Рёнхап” ёзган.

— Глобал савдо ва хавфсизлик тартиби ўзгаришда давом этаркан, ўйлайманки, ўхшаш қадрият, тузилма ва мафкурага эга Корея Республикаси ва Япония ҳамкорликни ҳар қачонгидан кучайтириши керак, — дея раҳбарнинг сўзларини келтирган агентлик.

Хабарда айтилишича, Сигэру Исиба Ли Чже Мённи қўллаб-қувватлаб, Япония, Жанубий Корея ва АҚШ ҳамкорлигини мустаҳкамлаш жуда муҳимлигини таъкидлаган.

Икки қўшни давлат етакчилари КХДР ядросизланишига эришиш ва АҚШ билан уч томонлама шерикликни мустаҳкамлаш ниятини яна бир бор тасдиқлаган.

— Корея ярим ороли тўлиқ ядросизланиши ва доимий тинчлик ўрнатилиши тарафдори эканимизни яна бир бор тасдиқладик, Шимолий Кореяга нисбатан сиёсатни яқиндан муҳокама қилишга келишиб олдик, — деган Ли Чже Мён матбуот анжуманида.

У Токиога ташрифини “келажакка қаратилган муносабат асосини мустаҳкамлаш имконияти, деб атади. Бу йил ўзаро дипломатик алоқа ўрнатилганига 60 йил тўлади.

Июнь ойи бошида лавозимга киришган Жанубий Корея янги Президенти Япониядан Вашингтонга йўл олди. Маълум қилинишича, АҚШ етакчиси Дональд Трамп билан учрашув Оқ уйда бўлиб ўтади. Раҳбарлар ярим ўтказгич, аккумулятор ва кемасозлик соҳаларига оид ой бошида эришилган савдо келишувига асосланиб, саноат ҳамкорлигини муҳокама қилиши кутиляпти.

Таъкидланганидек, Ли Чже Мён илк расмий ташрифи учун Японияни танлаши бироз ғайриоддий кўринади. Зеро, Жанубий Корея етакчилари лавозимга киришгандан кейин, одатда, биринчи бориладиган мамлакат сифатида АҚШ танланарди.

С.Раҳимов, ЎзА