Yaponiya Bas ministri Sigeru Isiba menen bolıp ótken sammit waqtında Qubla Koreya Prezidenti Li CHje Myon kún shıǵıs mámleketi jetekshisin global sawda sharayatı ózgerip atırǵan bir waqıtta tıǵızıraq birge islesiwdi jolǵa qoyıwǵa shaqırdı. Bul haqqında “Yonhap” jazǵan.

– Global sawda hám qáwipsizlik tártibi ózgeriwde dawam eter eken, uqsas qádiriyat, struktura hám ideologiyaǵa iye Koreya Respublikası hám Yaponiya birge islesiwdi hár qashanǵıdan da kúsheytiwi kerek, dep oylayman, – dep basshınıń sózlerin keltirgen agentlik.
Xabarda aytılıwınsha, Sigeru Isiba Li CHje Myondı qollap-quwatlap, Yaponiya, Qubla Koreya hám AQSh birge islesiwin bekkemlew oǵada áhmiyetli ekenin atap ótken.
Eki qońsı mámleket jetekshileri KXDRdı yadrosızlandırıwǵa erisiw hám AQSh penen úsh tárepleme sheriklikti bekkemlew niyetin jáne bir márte tastıyıqlaǵan.
– Koreya yarım atawı tolıq yadrosızlandırılıwı hám turaqlı tınıshlıq ornatılıwı tárepdarı ekenimizdi jáne bir márte tastıyıqladıq, Arqa Koreyaǵa baylanıslı siyasattı jaqınnan dodalawǵa kelisip aldıq, – dedi Li CHje Myon baspasóz ánjumanında.
Ol Tokioǵa saparın “keleshekke qaratılǵan múnásibet tiykarın bekkemlew imkaniyatı”, dep atadı. Bıyıl óz-ara diplomatiyalıq baylanıs ornatılǵanına 60 jıl toladı.
Iyun ayınıń basında lawazımǵa kirisken Qubla Koreyanıń jańa Prezidenti Yaponiyadan Vashingtonǵa jol aldı. Málim etiliwinshe, AQSh jetekshisi Donald Tramp penen ushırasıw Aq úyde bolıp ótedi. Basshılar yarım ótkizgish, akkumulyator hám keme soǵıw tarawlarına baylanıslı ay basında erisilgen sawda kelisimine tiykarlanıp, sanaatta birge islesiwdi dodalawı kútilmekte.
Atap ótilgenindey, Li CHje Myon dáslepki rásmiy saparı ushın Yaponiyanı tańlaǵanı biraz ersi kórinedi. Sebebi, Qubla Koreya jetekshileri lawazımǵa kiriskennen keyin, ádette, birinshi baratuǵın mámleket sıpatında AQSh tańlanatuǵın edi.

S.Rahimov, ÓzA