Жорий йил 5 мартда Коррупцияга қарши курашиш миллий кенгашининг кенгайтирилган йиғилишида давлатимиз раҳбари коррупция ислоҳотлар йўлидаги энг катта тўсиқ ва ғов эканини таъкидлади.

Коррупциянинг олдини олиш – давлат хизматига профессионал ва фидойи кадрларни танлаш ҳамда уларни “ҳалоллик вакцинаси” билан эмлашдан бошланиши қайд этилди. 

Коррупцияга қарши курашиш агентлигининг иш услуби ўзгартирилиши белгиланди. Тажриба тариқасида Соғлиқни сақлаш, Қурилиш, Сув хўжалиги вазирликлари, “Ўзнефтгаз” ва “Ўсувтаъминот” акциядорлик жамиятларининг комплаенс назорати агентликка ўтказилди.

Айни пайтда ушбу тажриба ўзини оқлаётгани коррупция ҳолатларини аниқлаш ва уларга барҳам бериш бўйича қилинаётган амалий ишларда намоён бўлмоқда. 

Мазкур мажлисда белгиланган устувор вазифалар ижросини самарали ташкил этиш  мақсадида Агентлик томонидан Тошкент шаҳрида коррупцияга қарши ички назорат бўлинмалари (комплаенс) самарадорлигини оширишга бағишланган интенсив ўқув курслари ташкил этилди.

Унда давлат органлари ва ташкилотларининг марказий, ҳудудий ва тасарруфидаги тизим ташкилотларидаги коррупцияга қарши ички назорат бўлинмаларининг 500 нафардан ортиқ ходими иштирок этди.

Мазкур ўқув дастури соҳада қабул қилинган асосий қарорлар ва меъёрий ҳужжатларни таҳлил қилиш, “e-anticor.uz” платформаси ва унинг янги модули билан ишлаш, шунингдек, 2024 йилги рейтинг баҳолаш натижалари бўйича йўл қўйилган хатоларни таҳлил қилишни қамраб олди.

Иштирокчилар таклиф этилган хорижий экспертлар билан манфаатлар тўқнашувини бошқариш, давлат хизматчиларининг коррупция хавф-хатарларига бардошлилигини баҳолаш ва уларни камайтиришнинг илғор хорижий тажриба ва усулларини қўллаш бўйича амалий машғулотларда қатнашди. 

Давлат органлари ва ташкилотларида коррупцияга қарши ички назорат тизимини самарали жорий этишда учраётган муаммолар, фаолиятни тартибга солувчи меъёрий ҳужжатларни амалиётга татбиқ этишда йўл қўйилаётган хато ва камчиликлар муҳокама қилиниб, фаолиятни янада такомиллаштириш бўйича таклиф ва тавсиялар ишлаб чиқилди. 

Н.Абдураимова,

ЎзА