Usı jıl 5-martta Korrupciyaǵa qarsı gúresiw milliy keńesiniń keńeytilgen májilisinde mámleketimiz basshısı korrupciya reformalar jolındaǵı eń úlken tosqınlıq ekenin atap ótti.

Korrupciyanıń aldın alıw – mámleketlik xızmetke professional hám pidayı kadrlardı tańlaw jáne olardı “hadallıq vakcinası” menen shanshıwdan baslanatuǵını atap ótildi.
Korrupciyaǵa qarsı gúresiw agentliginiń jumıs usılı ózgertiletuǵını belgilendi. Tájiriybe tárizinde Densawlıqtı saqlaw, Qurılıs, Suw xojalıǵı ministrlikleri, “Ózneftgaz” hám “Ózsuwtámiynat” akcionerlik jámiyetleriniń komplaens qadaǵalawı agentlikke ótkerildi.
Házirgi waqıtta bul tájiriybe ózin aqlap atırǵanı korrupciya jaǵdayların anıqlaw hám olarǵa shek qoyıw boyınsha islenip atırǵan ámeliy jumıslarda kórinbekte.
Bul májiliste belgilengen tiykarǵı wazıypalardıń orınlanıwın nátiyjeli shólkemlestiriw maqsetinde Agentlik tárepinen Tashkent qalasında korrupciyaǵa qarsı ishki qadaǵalaw (komplaens) bólimleriniń nátiyjeliligin arttırıwǵa baǵıshlanǵan intensiv oqıw kursları shólkemlestirildi.
Onda mámleketlik uyımlar hám shólkemlerdiń oraylıq, aymaqlıq hám qaramaǵındaǵı sistemalı shólkemlerdegi korrupciyaǵa qarsı ishki qadaǵalaw bólimleriniń 500 den aslam xızmetkeri qatnastı.
Bul oqıw baǵdarlaması tarawda qabıl etilgen tiykarǵı qararlar hám normativlik hújjetlerdi tallaw, “e-anticor.uz” platforması hám onıń jańa moduli menen islesiw, sonday-aq, 2024-jılǵı reyting bahalaw nátiyjeleri boyınsha jol qoyılǵan qátelerdi tallawdı qamtıp aldı.
Qatnasıwshılar mirát etilgen sırt elli ekspertler menen mápler soqlıǵısıwın basqarıw, mámleketlik xızmetkerlerdiń korrupciya qáwip-qáterlerine shıdamlılıǵın bahalaw hám olardı azaytıwdıń aldınǵı sırt el tájiriybesi hám usılların qollanıw boyınsha ámeliy sabaqlarda qatnastı.
Mámleketlik uyımlar hám shólkemlerde korrupciyaǵa qarsı ishki qadaǵalaw sistemasın nátiyjeli engiziwde ushırasıp atırǵan mashqalalar, jumıstı tártipke salıwshı normativlik hújjetlerdi ámeliyatqa engiziwde jol qoyılıp atırǵan qáte-kemshilikler dodalanıp, jumıstı bunnan bılay da jetilistiriw boyınsha usınıslar islep shıǵıldı.

N.Abduraimova,
ÓzA