Нукуслик омилкорлар
ФОТОРЕПОРТАЖ
Қорақалпоғистон Республикасининг Нукус тумани асосан полиз экинлари ва мева-сабзавот етиштиришга ихтисослашган бўлиб, бугунги кунда 59 фермер ва қишлоқ хўжалиги корхоналарига ер майдони ажратиб берилган. Мевачилик ва узумзорларни ривожлантириш мақсадида 118 та фермер ва қишлоқ хўжалиги корхонаси томонидан 432 гектар майдонда боғ ҳамда 15 фермер ва қишлоқ хўжалиги корхонасида 28 гектар узум плантацияси яратилган.
Туманнинг Тақиркўл қишлоғида яшовчи Омонгул Алламбергенова 2005 йилда оилавий тадбиркорлик асосида “Диана Мардона” фермер хўжалигини ташкил этган. Хўжалик тасарруфидаги ернинг 10 гектари экин майдони, 5 гектари ҳосилдор боғ, 2 гектари буғдойзор, 3 гектари полизни ташкил этади. 3 гектар ерда пиллачилик билан шуғулланувчиларга ёрдам тариқасида тутзор барпо этилган. Шунингдек, икки сотих ерда эртаки экинлар учун иссиқхона ташкил этилган. Бир гектар ерда етиштирилаётган қовун эса Қозоғистон Республикасига экспорт қилинмоқда.
Омилкор оила ҳар қарич ердан унумли фойдаланиб, дала четларига ҳам 1000 туп оқ терак ва 500 туп қора тол эккан. Шунингдек, парваришда 30 қути асалари ҳам бор.
Хўжаликда 15 кишига доимий иш ўрнига эга. Мавсумда эса яна 10-15 киши иш билан таъминланади.
Мақсад ҲАБИБУЛЛАЕВ(сурат),ЎзА