БМТнинг Тараққиёт дастури Ўзбекистон Республикаси Истиқболли лойиҳалар миллий агентлиги билан ҳамкорликда Тошкент шаҳрида “Такафулни амалиётга татбиқ этиш” мавзусида тренинг ташкил этди.

Тренингда суғурта бозорини тартибга солувчи орган, турли давлат ташкилотлари ҳамда Ўзбекистон суғурта соҳаси вакиллари иштирок этди. Тренингни ўтказиш учун индонезиялик халқаро эксперт Эрвин Ноэкман таклиф этилди.

Икки кун давом этган тренингда иштирокчилар Такафул моделлари, меъёрий-ҳуқуқий ва шариат асослари, шартнома тузилмалари, операцион тузилма ва бошқа мавзулар билан танишди.

– Такафул суғуртаси Ўзбекистон аҳолисини турли хавф-хатарлардан ҳимоя қилишга қаратилган бўлиб, соҳани ривожлантириш ва диверсификация қилишга хизмат қилади, – деди Агентлик суғурта бозорини ривожлантириш бошқармаси бошлиғи Отабек Ёқубов. – Шу боис тренингда қатнашиш маҳаллий суғурта бозори вакиллари учун жуда фойдали ва муҳим.

Тренинг Германия ҳукумати томонидан молиялаштирилган БМТ Тараққиёт дастурининг “Ўзбекистонда суғурта рискларини молиялаштириш (IRFF)” глобал лойиҳаси томонидан қўллаб-қувватланди. Унинг асосий мақсади лойиҳада иштирок этаётган мамлакатларни Ўзбекистон суғурта бозорини ривожлантиришда қўллаб-қувватлаш, жумладан, суғурта сиёсатини мамлакатнинг иқтисодий ривожланиш дастурига интеграциялаш, инклюзив суғуртани ривожлантириш, суверен хавфлар, табиий офатлардан келиб чиқадиган хавфларни молиялаштириш, қўшимча инвестицияларни суғурталашдан иборат.

Маълумот ўрнида атиш жоиз, Такафул ўзаро ёрдам ва ҳамкорликка асосланган, шариат тамойиллари доирасида фаолият юритувчи исломий суғурта тизими ҳисобланади. Бу кооператив тизим бўлиб, унда иштирокчилар анъанавий суғурта моделига таянмасдан, маълум рискларга нисбатан бир-бирларини қўллаб-қувватлаш учун ўз ресурсларини бирлаштиради.

Ш.Маматуропова,

ЎзА