BMShtıń Rawajlanıw baǵdarlaması Ózbekstan Respublikası Perspektivalı joybarlar milliy agentligi menen birgelikte Tashkent qalasında “Takafuldı ámeliyatqa engiziw” temasında trening shólkemlestirdi.

Treningte qamsızlandırıw bazarın tártipke salıwshı uyım, túrli mámleketlik shólkemler hám Ózbekstan qamsızlandırıw tarawınıń wákilleri qatnastı. Treningti ótkeriw ushın indoneziyalı xalıqaralıq ekspert Ervin Noekman mirát etildi.
Eki kún dawam etken treningte qatnasıwshılar Takaful modelleri, normativlik-huqıqıy hám sháriyat tiykarları, shártnama strukturaları, operaciyalıq struktura hám basqa temalar menen tanıstı.
– Takaful qamsızlandırıwı Ózbekstan xalqın túrli qáwip-qáterlerden qorǵawǵa qaratılǵan bolıp, tarawdı rawajlandırıw hám diversifikaciyalawǵa xızmet etedi, – dedi Agentlik qamsızlandırıw bazarın rawajlandırıw basqarmasınıń baslıǵı Otabek Yoqubov. – Sonıń ushın treningte qatnasıw jergilikli qamsızlandırıw bazarı wákilleri ushın júdá paydalı hám áhmiyetli.
Trening Germaniya húkimeti tárepinen qarjılandırılǵan BMSh Rawajlanıw baǵdarlamasınıń “Ózbekstanda qamsızlandırıw qáwip-qáterlerin qarjılandırıw (IRFF)” global joybarı tárepinen qollap-quwatlandı. Onıń tiykarǵı maqseti joybarda qatnasıp atırǵan mámleketlerdi Ózbekstan qamsızlandırıw bazarın rawajlandırıwda qollap-quwatlaw, sonıń ishinde, qamsızlandırıw siyasatın mámlekettiń ekonomikalıq rawajlanıw baǵdarlamasına integraciyalaw, inklyuziv qamsızlandırıwdı rawajlandırıw, suveren qáwip-qáterler, tábiyǵıy apatshılıqlardan kelip shıǵatuǵın qáwip-qáterlerdi qarjılandırıw, qosımsha investiciyalardı qamsızlandırıwdan ibarat.
Maǵlıwmat ornında atap ótiw orınlı, Takaful óz-ara járdem hám birge islesiwge tiykarlanǵan, sháriyat principleri sheńberinde jumıs alıp baratuǵın islam qamsızlandırıw sisteması esaplanadı. Bul kooperaciyalıq sistema bolıp, onda qatnasıwshılar dástúriy qamsızlandırıw modeline súyenbesten, belgili qáwip-qáterlerge baylanıslı bir-birin qollap-quwatlaw ushın óz resursların birlestiredi.

Sh.Mamaturopova, ÓzA