Бўзатов туманида спортнинг футбол ва кичик футбол турлари бўйича ўғил болалар ва қизлар ўртасида ўтказилган «Давлат хавфсизлик хизмати кубоги» мусобақалари ғолибларини тақдирлаш маросими бўлиб ўтди.

Тадбирда сўзга чиққанлар томонидан сўнгги йилларда мамлакатимизда Президентимиз томонидан спортга, жумладан, ёшларнинг спорт билан шуғулланишига қаратилаётган эътибор ва улар учун яратилган шарт-шароитлар кенг тарзда таъкидланиб, бундан ёшларимиз самарали фойдаланиб халқаро майдонларда катта ютуқларни қўлга киритаётганлиги фахр билан тилга олинди ва мусобақа ғолибларини эришган ютуқлари билан табриклади.

Ўтказилган мусобақалар якунида футбол бўйича эркаклар ўртасида, Еркиндарё қишлоқ фуқаролар йиғини ёшлари биринчи ўринни қўлга киритишга муваффақ бўлди. Фахрли иккинчи ва учинчи ўринлар бўлса, Кўксуу ва Қусхонатоу элатларининг жамоаларига насиб этди.

Спортнинг кичик футбол тури бўйича ўтказилган ўйинлар якунида эса, Бўзатов посёлкаси ёшларидан тузилган жамоага тенг келадиган рақиб топилмади. Иккинчи ва учинчи ўринларни эса, Еркиндарё ва Қусхонатов ОФЙ ёшлари қўлга киритди.

Қизлар ўртасида ўтказилган ўйинларда эса, Еркиндарё элатининг қизлар жамоаси барча рақибларини енгиб чиқиб, олтин медаль соҳибига айланди.

Иккинчи ва учинчи ўринларни Бўзатов посёлкаси ва Қусханатов ОФЙ қизлари жамоалари қўлга киритишга муваффақ бўлди.

Спорт мусобақаларида ғолиб бўлган жамоалар ташкилотчилар томонидан махсус диплом, кубок, медаль ва эсдалик совғалари билан тақдирланди.

Адилбай Оразов,

Қорақалпоғистон ахборот агентлиги шарҳловчиси