Bozataw rayonında sporttıń futbol hám kishi futbol túrleri boyınsha er balalar hám qızlar arasında ótkerilgen «Mámleketlik qáwipsizlik xızmeti kubogi» jarıslarınıń jeńimpazların sıylıqlaw saltanatı bolıp ótti.

Ilajda shıǵıp sóylewshiler tárepinen sońǵı jılları elimizde Prezidentimiz tárepinen sportqa, sonıń ishinde jaslardıń sport penen shuǵıllanıwına qaratılıp atırǵan itibar hám olar ushın jaratılǵan sharayatlardı keń túrde aytıp ótip, bunnan jaslarımız nátiyjeli paydalanıp  xalıqaralıq maydanlarda úlken tabıslardı kirgizip atırǵanlıǵın maqtanısh etti hám jarıs jeńimpazların erisken jetiskenlikleri menen qutlıqladı.

Ótkerilgen jarıslar sońında futbol boyınsha erler arasında, Erkindárya awıl puqaralar jıyını jasları birinshi orındı jeńip alıwǵa miyasar boldı. Al, sıylı ekinshi hám úshinshi orınlar bolsa,  Kóksuw  hám Qusxanataw elatlarınıń komandalarına nesip etti.

Sporttıń kishi futbol túri boyınsha ótkerilgen oyınlar juwmaǵında bolsa, Bozataw posyolkası jaslarınan dúzilgen komandaǵa teń keletuǵın qarsılas tabılmadı. Ekinshi hám úshinshi orınlardı bolsa,  Erkindárya hám  Qusxanataw APJ jasları jeńip aldı.

Qızlar arasında ótkerilgen oyınlarda bolsa, Erkindárya elatınıń  qızlar komandası barlıq qarsılasların jeńip shıǵıp, altın medal iyesine aylandı. Ekinshi hám úshinshi orınlardı Bozataw posyolkası hám Qusxanataw APJ qızları komandaları jeńip alıwǵa miyasar boldı.

Sport jarıslarında jeńimpaz bolǵan komandalar shólkemlestiriwshiler tárepinen arnawlı diplom, kubok, medal hám estelik sawǵalar  menen sıylıqlandı.

Adilbay Orazov,

Qaraqalpaqstan xabar agentligi sholıwshısı