Беруний туманида пиллачилик соҳасига эътибор йилдан-йилга ортиб бормоқда. Пилла етиштиришнинг нозик жиҳатларини пухта эгаллаган пиллакорлар бу йил ҳам бу соҳада фаол иштирок этиб, нафақат ўз оилалари даромадини ошириш, балки маҳаллаларда иш билан таъминлашга муҳим ҳисса қўшмоқда.
2025 йил мавсумида туманнинг 13 ҳудудига жами 3212 қути павон қурти тарқатилди. Ушбу ташаббус натижасида 5100 нафар хотин-қизнинг бандлиги таъминланди. Бу эса нафақат иқтисодий самарадорликни, балки хотин-қизларни ижтимоий фаолликка кенг жалб этиш имкониятини яратмоқда, – дея маълумот беради Беруний тумани ҳокимлиги Ахборот хизмати бўлими бошлиғи А.Уразова.
Хусусан, Тинчлик овул фуқаролар йиғинида 176 хонадонга 450 қути ипак қурти тарқатилган бўлиб, ҳозирги вақтда парваришлаш ишлари қизғин давом этмоқда. Йил бошида «Аёллар дафтари»нинг 6-босқич, 1-босқичи доирасида 261 нафар хотин-қиз рўйхатга олиниб, уларнинг уй шароитида меҳнат билан бандлигини таъминлаш мақсадида ипак қурти берилди.
Шунингдек, тут плантацияларига туташ бўш ер майдонларига полиз экинлари экилиб, оилаларга қўшимча даромад манбаи яратилди. Бу эса деҳқончилик билан пиллачиликни уйғунлаштириб, комплекс ёндашувга асосланган, баракали натижаларга олиб келмоқда.
Ҳудудларда олиб борилаётган ишлар билан танишган Беруний тумани ҳокимининг ўринбосари, Оила ва хотин-қизлар бўлими бошлиғи С.Козиева фаолларнинг хонадонларида бўлиб, меҳнаткаш пиллакор аёлларга самимий миннатдорлик билдирди. Бу эътибор хотин-қизларни янада рағбатлантириб, уларни иқтисодий ва ижтимоий ҳаётда фаол бўлишга ундайди.
Қорақалпоғистон ахборот агентлиги