Beruniy rayonında pilleshilik tarawına itibar jıldan-jılǵa artıp barmaqta. Pille jetistiriwdiń názik táreplerin puqta iyelegen pillekeshler bıyıl da bul tarawda belsene qatnasıp, tek ǵana óz shańaraqlarınıń dáramatların arttırıp qoymastan, al máhállelerde jumıs penen támiyinlewde áhmiyetli úles qospaqta.
2025-jıl máwsiminde rayonnıń 13 aymaǵına jámi 3212 qutı nawqan qurtı tarqatıldı. Bul baslama nátiyjesinde 5100 hayal-qızdıń bántligi támiyinlendi. Bul bolsa tek ǵana ekonomikalıq nátiyjelilikti emes, al hayal-qızlardı sociallıq belsendilikke keńnen tartıw imkaniyatın jaratpaqta, – dep maǵlıwmat beredi Beruniy rayonı hákimligi Málimleme xızmeti bólimi baslıǵı A.Urazova.
Atap aytqanda, Tınıshlıq awıl puqaralar jıyınında 176 shańaraqqa 450 qutı nawqan qurtı tarqatılǵan bolıp, házirgi waqıtta tárbiyalaw jumısları qızǵın dawam etpekte. Jıldıń basında “Hayal-qızlar dápteri”niń 6-basqısh, 1-basqıshı sheńberinde 261 hayal-qız dizimge alınıp, olardıń úy sharayatında miynet penen bántligin támiyinlew maqsetinde nawqan qurtı berildi.
Sonday-aq, tut plantaciyalarına tutas bos jer maydanlarına palız eginleri egilip, shańaraqlarǵa qosımsha dáramat dáregi jaratıldı. Bul bolsa diyqanshılıq penen pilleshilikti birlestirip, kompleksli qatnasqa tiykarlanǵan, bereketli nátiyjelerge alıp kelmekte.
Aymaqlarda alıp barılıp atırǵan jumıslar menen tanısqan Beruniy rayonı hákiminiń orınbasarı, Shańaraq hám hayal-qızlar bóliminiń baslıǵı S.Kozieva belsendilerdiń shańaraqlarında bolıp, miynetkesh pillekesh hayal-qızlarǵa shın júrekten minnetdarshılıq bildirdi. Bul itibar hayal-qızlardı jáne de xoshametlep, olardı ekonomikalıq hám sociallıq turmısta belsendi bolıwǵa shaqıradı.
Qaraqalpaqstan xabar agentligi