Юқумли касалликларнинг олдини олишда аҳолининг ушбу касалликлар ҳақида хабардорлиги, касалликка аниқ ва тезкор ташхис қўйиш муҳим роль ўйнайди. Шу боис, бу борада мамлакатимизда халқаро ташкилотлар билан ҳамкорликда кенг кўламли ишлар амалга оширилмоқда.

АОКАда ўтказилган матбуот анжуманида Санитария-эпидемиологик осойишталик ва жамоат саломатлиги қўмитаси мутасаддилари, ЖССТнинг Ўзбекистондаги ваколатхонаси раҳбари, ЮНИСЕФнинг Ўзбекистондаги ваколатхонаси раҳбари, KOFIHнинг лойиҳаларни назорат қилиш ва мувофиқлаштириш мутахассислари ҳамкорликдаги лойиҳалар юзасидан батафсил маълумот берди.

Таъкидланганидек, гепатит дунёда энг кўп одамлар вафот этадиган юқумли касалликлар орасида иккинчи ўринда туради, йилига 1,3 миллион инсоннинг ўлимига сабаб бўлади. Яъни, юқумли касалликлар орасида ўлимнинг асосий сабаби бўлган сил касаллиги билан бир хил ҳисобланади. Жаҳон соғлиқни сақлаш ташкилотининг 2024 йилги глобал гепатит ҳисоботига кўра, ушбу касаллик қурбонлари сони доимий ўсиб бормоқда.

2022 йилнинг 16 май куни қабул қилинган «Айрим долзарб вирусли инфекциялар тарқалишига қарши курашиш чора-чора-тадбирларини такомиллаштириш тўғрисида»ги Президент қарорига мувофиқ, мамлакатимизда кенг кўламли скрининг ва профилактик чора-тадбирлар амалга оширилмоқда.

Жорий йилнинг 14 апрель ҳолатига республикада аҳолининг 1 446 497 нафари (75,1 фоизи) вирусли гепатит “В” турига, 1 446 628 нафари (75,2 фоизи) вирусли гепатит “С” турига скрининг текширувидан ўтказилган. Скрининг текширувидан ўтказилган аҳолинининг 40 889 нафарида (2,8 фоизи) гепатит “В”, 49 886 нафарида (3,4 фоизи) гепатит “С” аниқланган. Қарорда белгиланганидек, вирусли гепатит “С” билан касалланган беморларни вирусга қарши даволашни 10,5 минг нафаргача етказиш режа қилинган. Вирусли гепатит “В” инфекциясининг юқиш хавфи юқори бўлган жами 119 013 минг нафар тиббиёт ходимини ушбу инфекцияга қарши тўлиқ эмлаш ишлари ўтказилди.

Мутахассисларнинг сўзларига кўра, юқумли касалликларнинг олдини олишда эмлашнинг аҳамияти жуда катта. Шу боис, ҳар йили ЖССТ Европа ва Марказий Осиё минтақавий бюроси ва унга аъзо бўлган бир қатор давлатларда иммунизация бўйича хабардорликни ошириш, коммуникацияни яхшилаш ва эмлашни тарғиб қилишга қаратилган Европа эмлаш ҳафталиги ўтказилади. 27 апрелдан амалга оширилаётган ушбу ташаббус 3 май кунига қадар давом этади.

Моҳигул Қосимова, ЎзА