Juqpalı keselliklerdiń aldın alıwda xalıqtıń usı kesellikler haqqında xabardar ekenligi, kesellike anıq hám jedel diagnoz qoyıw áhmiyetli rol atqaradı. Sonıń ushın, bul baǵdarda mámleketimizde xalıqaralıq shólkemler menen birgelikte keń kólemli jumıslar ámelge asırılmaqta.

MǴKAda ótkerilgen baspasóz ánjumanında Sanitariyalıq-epidemiologiyalıq tınıshlıq hám jámiyet salamatlıǵı komitetiniń juwapkerleri, JDSShnıń Ózbekstandaǵı wákilxanasınıń basshısı, YuNISEFtiń Ózbekstandaǵı wákilxanasınıń basshısı, KOFIHtiń joybarlardı qadaǵalaw hám muwapıqlastırıw qánigeleri birgeliktegi joybarlar boyınsha tolıq maǵlıwmat berdi.
Atap ótilgenindey, gepatit dúnyada eń kóp adamlar qaytıs bolatuǵın juqpalı kesellikler arasında ekinshi orında turadı, jılına 1,3 million insannıń ólimine sebepshi boladı. Yaǵnıy, juqpalı kesellikler arasında ólimniń tiykarǵı sebebi bolǵan tuberkulyoz keselligi bolıp esaplanadı. Jáhán densawlıqtı saqlaw shólkeminiń 2024-jılǵı global gepatit esabatına bola, bul kesellik qurbanlarınıń sanı turaqlı ósip barmaqta.
2022-jıldıń 16-may kúni qabıl etilgen «Ayırım áhmiyetli viruslı infekciyalar tarqalıwına qarsı gúresiw ilajların jetilistiriw haqqında»ǵı Prezident qararına muwapıq, mámleketimizde keń kólemli skrining hám profilaktikalıq ilajlar ámelge asırılmaqta.
Usı jıldıń 14-aprel jaǵdayına respublikada xalıqtıń 1 446 497si (75,1 procenti) viruslı gepatit «V» túrine, 1 446 628i (75,2 procenti) viruslı gepatit «S» túrine skrining tekseriwinen ótkerilgen. Skrining tekseriwinen ótkerilgen xalıqtıń 40 889ında (2,8 procenti) gepatit «V», 49 886sında (3,4 procenti) gepatit «S» anıqlanǵan. Qararda belgilengenindey, viruslı gepatit «S» menen kesellengen nawqaslardı virusqa qarsı emlewdi 10,5 mıńǵa shekem jetkeriw rejelestirilgen. Viruslı gepatit «V» infekciyasınıń juǵıw qáwpi joqarı bolǵan jámi 119 013 mıń medicina xızmetkerin usı infekciyaǵa qarsı tolıq shanshıw jumısları ótkerildi.
Qánigelerdiń sózlerine bola, juqpalı keselliklerdiń aldın alıwda shanshıwdıń áhmiyeti júdá úlken. Sonıń ushın, hár jılı JDSSh Evropa hám Oraylıq Aziya regionallıq byurosı hám oǵan aǵza bolǵan bir qatar mámleketlerde immunizaciya boyınsha xabardarlıqtı arttırıw, kommunikaciyanı jaqsılaw hám shanshıwdı úgit-násiyatlawǵa qaratılǵan Evropa shanshıw hápteligi ótkeriledi. 27-aprelden ámelge asırılıp atırǵan bul baslama 3-may kúnine shekem dawam etedi.

Mohigul Qosimova, ÓzA